ഇടുങ്ങിയ ചിന്ത പാടില്ല: പാക് കലാകാരൻമാരെ ഇന്ത്യയിൽ വിലക്കണമെന്ന ഹർജി തള്ളി സുപ്രീംകോടതി
ന്യൂഡൽഹി: പാകിസ്ഥാൻ കലാകാരൻമാരെ ഇന്ത്യയിൽ വിലക്കണമെന്നാവശ്യപ്പെട്ട് നൽകിയ ഹർജി തള്ളി സുപ്രീംകോടതി. പാക് കലാകാരൻമാർ ഇന്ത്യയിൽ പരിപാടി അവതരിപ്പിക്കുന്നതും സിനിമയിൽ ജോലി ചെയ്യുന്നതും വിലക്കണമെന്നാവശ്യപ്പെട്ട് സിനിമ പ്രവർത്തകനായ ഫായിസ് അൻവർ ഖുറേഷി നൽകിയ ഹർജിയാണ് തള്ളിയത്. ഇയാൾ നൽകിയ ഹർജി ബോംബെ ഹൈക്കോടതി തള്ളിയിരുന്നു. ഈ വിധിയിൽ ഇടപെടാനാകില്ലെന്നും ഇത്രയ്ക്കും ഇടുങ്ങിയ ചിന്താഗതി വച്ചുപുലർത്തരുതെന്നും സുപ്രീംകോടതി പറഞ്ഞു. ജസ്റ്റിസ് സഞ്ജീവ് ഖന്ന, എസ് വി എൻ ഭട്ടി എന്നിവരടങ്ങിയ ബെഞ്ചിന്റേതാണ് അഭിപ്രായം.
ഇന്ത്യയിൽ കലാപരിപാടികൾ അവതരിപ്പിക്കാനോ, സിനിമ മേഖലയിൽ ജോലി എടുക്കുന്നതിനോ പാകിസ്ഥാൻ കലാകാരന്മാർക്ക് സമ്പൂർണ വിലക്ക് ഏർപ്പെടുത്താൻ കേന്ദ്ര സർക്കാരിനോട് കോടതി നിർദേശിക്കണം എന്ന് ആവശ്യപ്പെട്ടായിരുന്നു ഫായിസ് അൻവർ ഖുറേഷി ഹർജി നൽകിയത്. സിനിമാ പ്രവർത്തകർ, ഗായകർ, സംഗീതജ്ഞർ, ഗാനരചയിതാക്കൾ, സാങ്കേതിക വിദഗ്ധർ എന്നിവരുൾപ്പെടെ എല്ലാവർക്കും ഈ ഉത്തരവ് ബാധകമാക്കണമെന്നും ഹർജിക്കാരൻ കോടതിയിൽ വാദിച്ചിരുന്നു. ഇതിനെ ബോംബെ ഹൈക്കോടതി രൂക്ഷമായി വിമർശിച്ചിരുന്നു.
