ദേശീയ പതാകയെ അപമാനിച്ചു; ബിജെപിയുടെ കൊടിമരത്തില്‍ ദേശീയ പതാക ഉയര്‍ത്തി പ്രവര്‍ത്തകര്‍
ദേശീയ പതാകയെ അപമാനിച്ച് ബിജെപി. ബിജെപിയുടെ കൊടിമരത്തില്‍ ദേശീയ പതാക ഉയര്‍ത്തി ബിജെപി പ്രവര്‍ത്തകര്‍. തിരുവനന്തപുരം പേട്ട ജംഗ്ഷനിലാണ് ബിജെപി പ്രവര്‍ത്തകര്‍ പതാക ഉയര്‍ത്തിയത്. കണ്ണൂരിലും സമാന സംഭവമുണ്ടായി. കണ്ണൂര്‍ മുയിപ്രയില്‍ ബിജെപി കൊടിമരത്തില്‍ ദേശീയപതാക കെട്ടി. സംഭവത്തില്‍ പൊലീസില്‍ പരാതി നല്‍കി DYFI. സ്വാതന്ത്ര്യദിനത്തോടനുബന്ധിച്ച് ദേശീയ പതാക ഇന്ന് രാവിലെ ഉയര്‍ത്തിയത് ബിജെപിയുടെ കൊടിമരത്തിലാണ്.
ദേശീയ പതാക ഉയര്‍ത്തുന്നതുമായി ബന്ധപ്പെട്ട് കൃത്യമായ മാനദണ്ഡങ്ങള്‍ ഉള്ളതാണ്. രാഷ്ട്രീയ പാര്‍ട്ടികളുടെ കൊടിമരങ്ങളില്‍ ദേശീയ പതാക ഉയര്‍ത്താന്‍ പാടില്ല എന്നുള്ള മാനദണ്ഡത്തിന്റെ ലംഘനമാണ് ഇവിടെ നടന്നത്. കൊടിമരത്തില്‍ നേരത്തെ ബിജെപിയുടെ കൊടി ഉണ്ടായിരുന്നു അത് അഴിച്ചുമാറ്റിയാണ് അതേകൊടിമരത്തില്‍ ബിജെപി പ്രവര്‍ത്തകര്‍ ദേശീയ പതാക ഉയര്‍ത്തിക്കെട്ടിയത്. ഇത് ദേശീയ പതാകയോടുള്ള അനാദരവാണ്. ഇക്കാര്യം ചൂണ്ടിക്കാട്ടി ഡിവൈഎഫ്‌ഐ പൊലീസില്‍ പരാതി നല്‍കി.
