റേഷൻ വിഹിതം വാങ്ങിയില്ല; 59,688 കുടുംബങ്ങളുടെ സൗജന്യ റേഷൻ വിഹിതം നഷ്ടമായി
കൊച്ചി: തുടർച്ചയായി മൂന്ന് മാസം റേഷൻ വിഹിതം വാങ്ങാതിരുന്ന സംസ്ഥാനത്തെ 59,688 കുടുംബങ്ങളുടെ സൗജന്യ റേഷൻ വിഹിതം നഷ്ടമായി. മുൻഗണന വിഭാഗത്തിൽ റേഷൻ വിഹിതം വാങ്ങിയിരുന്നവർ ആനുകൂല്യമില്ലാത്ത റേഷൻ കാർഡിലേക്ക് (എൻ പി എൻ എ സ്നോൺ പ്രയോറിറ്റി നോൺ സബ്സിഡി) തരംമാറ്റപ്പെടുകയും ചെയ്തു. ഇനി മുൻഗണന ലഭിക്കണമെങ്കിൽ പുതിയ അപേക്ഷ നൽക്കേണ്ടിവരും.
പ്രയോറിറ്റി ഹൗസ് ഹോൾഡ് (പിഎച്ച്എച്ച്) വിഭാഗത്തിലെ 48,724 പേരും അന്ത്യോദയ അന്നയോജന (എഎവൈ) വിഭാഗത്തിലെ 6,672 പേരും നോൺ പ്രയോറിറ്റി സബ്സിഡി (എൻപിഎസ്) വിഭാഗത്തിലെ 4,292 പേരും പട്ടികയിൽ നിന്ന് പുറത്തായി. സംസ്ഥാനത്തെ ഏത് റേഷൻകടയിൽനിന്ന് വിഹിതം വാങ്ങാമായിരുന്നിട്ടും മുൻഗണനാ വിഭാഗത്തിൽപെട്ടവർ വാങ്ങാതിരിക്കുന്നത് ശ്രദ്ധയിൽപ്പെട്ടതിനെത്തുടർന്നാണ് നടപടിയെടുക്കാൻ പൊതുവിതരണവകുപ്പ് തീരുമാനിച്ചത്.