ലഹരി ഉപയോഗത്തിന്‌ തടയിടാൻ കുടുംബശ്രീ ജില്ലാ മിഷൻ സംഘടിപ്പിക്കുന്ന ‘ചേതന’ ക്യാമ്പയിൻ പ്രവർത്തനങ്ങൾക്ക്‌ തുടക്കം
കോഴിക്കോട്: ലഹരി ഉപയോഗത്തിന്‌ തടയിടാൻ കുടുംബശ്രീ ജില്ലാ മിഷനും വിമുക്തി മിഷനും ചേര്‍ന്ന് സംഘടിപ്പിക്കുന്ന ‘ചേതന’ ക്യാമ്പയിൻ പ്രവർത്തനങ്ങൾക്ക്‌ തുടക്കം. ലഹരി വിരുദ്ധ ക്യാമ്പയിൻറെ ഭാഗമായി ആദ്യഘട്ട ജില്ലാതല പരിശീലനം പൂർത്തിയായി. കുടുംബശ്രീ കമ്യൂണിറ്റി കൗൺസിലർമാർ, കോസ്റ്റൽ വളണ്ടിയർമാർ, ട്രൈബൽ അനിമേറ്റർമാർ, ബാലസഭ, ഏക്‌സാഥ് റിസോഴ്‌സ് പേഴ്‌സൺമാർ എന്നിവർ ഉൾപ്പെടെ 100 പേർക്കാണ്‌ ആദ്യഘട്ടത്തിൽ പരിശീലനം നൽകുന്നത്.
രണ്ടാംഘട്ട പരിശീലനം 15ന്‌ നടക്കും. ജില്ലാ പരിശീലനം പൂർത്തിയാകുന്നതോടെ ബ്ലോക്ക്‌തല ശിൽപ്പശാലകൾ ഉൾപ്പെടെ സംഘടിപ്പിക്കും. വർധിക്കുന്ന ലഹരി ഉപയോഗത്തെ പ്രതിരോധിക്കുന്നതിനും വിദ്യാർത്ഥികളടക്കം ലഹരിക്ക് അടിമപ്പെടുന്നവരെ ജീവിതത്തിലേക്ക് തിരികെ കൊണ്ടുവരുന്നതിനുമായാണ്‌ ‘ചേതന’ ലഹരി വിരുദ്ധ ക്യാമ്പയിൻ നടപ്പാക്കുന്നത്‌.
ജില്ലാതല പരിശീലനം അസി. കലക്ടർ പ്രതീക് ജെയിൻ ഉദ്ഘാടനം ചെയ്തു. ഡെപ്യൂട്ടി എക്‌സൈസ് കമീഷണർ വി രാജേന്ദ്രൻ അധ്യക്ഷനായി. എക്‌സൈസ് പ്രിവന്റീവ് ഓഫീസർ സന്തോഷ് ചെറുവോട്ട്, മാനസിക ആരോഗ്യ കേന്ദ്രം സീനിയർ ക്ലിനിക്കൽ സൈക്കോളജിസ്റ്റ് ഡോ. പി ടി സന്ദീഷ് എന്നിവർ പരിശീലന ക്ലാസുകൾക്ക് നേതൃത്വം നൽകി.
വനിതാ ശിശു വികസന ഓഫീസർ സബീന ബീഗം, വിമുക്തി മാനേജർ അസി. എക്‌സൈസ് കമീഷണർ എ ജെ ബെഞ്ചമിൻ, വിമുക്തി ജില്ലാ കോ ഓർഡിനേറ്റർ ഇ പ്രിയ എന്നിവർ സംസാരിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ ആർ സിന്ധു സ്വാഗതവും നിഷിദ സൈബൂനി നന്ദിയും പറഞ്ഞു.
