ഇടുക്കി അണക്കെട്ടിൽ വിസ്മയമായി ലേസർ ഷോ; ചരിത്രമുറങ്ങുന്ന ആർച്ച് ഡാമിൽ വർണ്ണക്കാഴ്ചകളുടെ വിരുന്ന്
.
ഇടുക്കി: ഏഷ്യയിലെ ഏറ്റവും വലിയ ആർച്ച് ഡാമുകളിലൊന്നായ ഇടുക്കി അണക്കെട്ടിൽ അത്യാധുനിക ലേസർ ഷോയ്ക്ക് തുടക്കമാകുന്നു. ഇടുക്കിയുടെ നിർമ്മാണ ചരിത്രവും ഹൈഡ്രോ ഇലക്ട്രിക് പ്രോജക്ടിന്റെ പ്രാധാന്യവും വിനോദസഞ്ചാരികൾക്ക് മുന്നിൽ ദൃശ്യവിരുന്നായി എത്തിക്കുന്നതാണ് ഈ പദ്ധതി.
ടൂറിസം വകുപ്പും കെഎസ്ഇബിയും സംയുക്തമായാണ് ലേസർ ഷോ ഒരുക്കുന്നത്. അണക്കെട്ടിന്റെ ഭീമാകാരമായ കോൺക്രീറ്റ് ഭിത്തിയിൽ ആധുനിക പ്രൊജക്ഷൻ മാപ്പിംഗ് സാങ്കേതികവിദ്യ ഉപയോഗിച്ചാണ് ഷോ അവതരിപ്പിക്കുന്നത്. ഇടുക്കി ഡാമിന്റെ നിർമ്മാണം, കുറവൻ-കുറത്തി മലകളുടെ ഐതിഹ്യം വൈദ്യുതി ഉൽപ്പാദനം എന്നിവ കോർത്തിണക്കിയുള്ള കഥാവിഷ്കാരമാണ് ലേസർ ഷോയിൽ ഉൾപ്പെടുത്തിയിരിക്കുന്നത്.
വൈകുന്നേരങ്ങളിൽ എത്തുന്ന സഞ്ചാരികൾക്ക് ഇടുക്കിയുടെ ചരിത്രം വർണ്ണാഭമായ വെളിച്ചത്തിലൂടെയും ശബ്ദത്തിലൂടെയും ആസ്വദിക്കാനുള്ള അവസരമാണിത്. വിനോദസഞ്ചാര മേഖലയ്ക്ക് വലിയ കുതിച്ചുചാട്ടം നൽകുന്ന ഈ പദ്ധതി, ഇടുക്കിയെ ലോക വിനോദസഞ്ചാര ഭൂപടത്തിൽ കൂടുതൽ ആകർഷകമാക്കും. പദ്ധതിയുടെ പരീക്ഷണാടിസ്ഥാനത്തിലുള്ള പ്രദർശനം വൻ വിജയമായിരുന്നു.
