നിരവധി കേസ്സുകളിൽ ഉൾപ്പെട്ട പ്രതിയെ കാപ്പ ചുമത്തി നാടുകടത്തി
കോഴിക്കോട്: നിരവധി കേസ്സുകളിൽ ഉൾപ്പെട്ട പ്രതിയെ കാപ്പ ചുമത്തി നാടുകടത്തി. കോഴിക്കോട് നഗരത്തിന്റെ പല ഭാഗങ്ങളിലും സാമൂഹ്യ വിരുദ്ധ പ്രവർത്തനങ്ങളിലും, പൊതു സമൂഹത്തിന് ഭീഷണിയാവുന്ന രീതിയിലുള്ള പ്രവർത്തികളിലും ഏർപ്പെട്ട കോഴിക്കോട് മുഖദാർ സ്വദേശി അറക്കൽ തൊടുക വീട്ടിൽ അജ്മൽ ബിലാൽ (24) വിനെയാണ് കാപ്പ ചുമത്തി നാടുകടത്തിയത്.
പ്രതിയ്ക്ക് കോഴിക്കോട് സിറ്റി പോലീസ് ജില്ലയിലെ ചെമ്മങ്ങാട്, ടൌൺ, മെഡിക്കൽ കോളേജ്, ചേവായൂർ, പന്നിയങ്കര, കസബ, നടക്കാവ് എന്നീ പോലീസ് സ്റ്റേഷനുകളിലായി പണവും മൊബൈൽ ഫോണും ഇരുചക്ര വാഹനങ്ങളും മറ്റു് വിലിപിടിപ്പുള്ള മുതലുകളും കളവ് നടത്തിയതിനും, വീട്ടിൽ കയറി സ്ത്രീകൾക്കെതിരെ അതിക്രമം കാണിച്ചതിനും, പൊതുസ്ഥലത്തുവെച്ച് മയക്കുമരുന്ന് ഉപയോഗിച്ചതിനും, സാമൂഹ്യ വിരുദ്ധ പ്രവർത്തനങ്ങളിൽ ഏർപ്പെടുന്ന ആളുകളോടൊത്ത് സംഘശക്തിയായും ഒറ്റയ്ക്കും മാരകായുധം കാണിച്ച് ഭീഷണിപ്പെടുത്തി പണവും മൊബൈൽഫോണും എ.ടി.എം. കാർഡും കവർച്ച ചെയ്യുകയും ആയതിലെ രഹസ്യ നമ്പർ കൈക്കലാക്കി പണം അപഹരിച്ചതിനും മറ്റുമായി നിരവധി കേസ്സുകൾ നിലവിലുണ്ട്.
ചെമ്മങ്ങാട് പോലീസ് സ്റ്റേഷനിലെ റൌഡി ലിസ്റ്റിൽ ഉൾപ്പെട്ടിട്ടുള്ള പ്രതി ഗുരുതര കുറ്റകൃത്യങ്ങൾ ചെയ്ത് പൊതുസമൂഹത്തിന് ഭീഷണിയാവുന്ന രീതിയിൽ തുടർച്ചയായി നിരവധി കേസ്സുകളിൽ ഉൾപ്പെട്ടുവരുന്നതിനെ തുടർന്നാണ് പ്രതിക്കെതിരെ ചെമ്മങ്ങാട് പോലീസ് KAAPA നടപടി സ്വീകരിച്ചത്. പ്രതിക്കെതിരെ ചെമ്മങ്ങാട് പോലീസ് സ്റ്റേഷൻ ഇൻസ്പെക്ടർ നൽകിയ പ്രാഥമിക റിപ്പോർട്ട് പ്രകാരം കോഴിക്കോട് സിറ്റി ഡെപ്യൂട്ടി കമ്മിഷണർ സമർപ്പിച്ച ശുപാർശയിലാണ് ഡി.ഐ.ജി. & കമ്മിഷണർ കോഴിക്കോട് സിറ്റി ഒരു വർഷത്തേക്ക് നടുകടത്തൽ ഉത്തരവ് പുറപ്പെടുവിച്ചത്.
