ലോക്സഭാ സ്പീക്കറായി ഓം ബിര്‍ളയെ തെരഞ്ഞെടുത്തു
ഡല്‍ഹി: ലോക്സഭാ സ്പീക്കറായി രാജസ്ഥാനില്‍നിന്നുള്ള ബിജെപി എംപി ഓം ബിര്‍ളയെ തെരഞ്ഞെടുത്തു. എതിര്‍സ്ഥാനാര്‍ഥിയെ മത്സരിപ്പിക്കേണ്ടെന്ന് പ്രതിപക്ഷം തീരുമാനിച്ച സാഹചര്യത്തില്‍ ഓം ബിര്‍ളയെ ഏകകണ്ഠമായാണ് തെരഞ്ഞെടുത്തത്.
സ്പീക്കര്‍ സ്ഥാനത്തേക്ക് ഓം ബിര്‍ളയെ എന്‍ഡിഎ കഴിഞ്ഞ ദിവസം നാമനിര്‍ദേശം ചെയ്തിരുന്നു. രാജസ്ഥാനിലെ കോട്ട മണ്ഡലത്തില്‍ നിന്നുള്ള അംഗമാണ് ഓം ബിര്‍ള. രണ്ടാം തവണ എംപി ആകുന്ന ഓം ബിര്‍ള മൂന്നു തവണ രാജസ്ഥാന്‍ നിയമസഭയില്‍ കോട്ട-ബൂന്ദി മണ്ഡലത്തെ പ്രതിനിധീകരിച്ച എംഎല്‍എ ആയിരുന്നു. എന്‍ഡിഎ യോഗത്തില്‍ പ്രധാനമന്ത്രി നരേന്ദ്ര മോദിയാണ് ഓം ബിര്‍ളയുടെ പേരു നിര്‍ദേശിച്ചത്. ശിരോമണി അകാലിദള്‍ നേതാവ് സുഖ്ബീര്‍ സിംഗ് ബാദല്‍, ശിവസേനാ നേതാവ് അരവിന്ദ് സാവന്ത് എന്നിവര്‍ ഇതിനെ പിന്താങ്ങി.
