തിരുവനന്തപുരത്ത് യൂത്ത് കോൺഗ്രസ് നടത്തിയ പ്രതിഷേധം അക്രമാസക്തം; പൊലീസിന് നേരെ കല്ലേറ്
.
തലസ്ഥാനത്ത് യൂത്ത് കോൺഗ്രസ് നടത്തിയ പ്രതിഷേധ മാർച്ച് അക്രമാസക്തമായി. ശബരിമലയിലെ സ്വർണ്ണ മോഷണം ഉൾപ്പെടെയുള്ള വിവിധ വിഷയങ്ങൾ ഉന്നയിച്ച് നടത്തിയ മാർച്ചാണ് സംഘർഷത്തിൽ കലാശിച്ചത്. മാർച്ച് ആരംഭിച്ചത് മുതൽ തന്നെ പ്രവർത്തകർ അക്രമണ സ്വഭാവമാണ് പ്രകടിപ്പിച്ചത്.
ബാരിക്കേഡുകൾക്ക് സമീപം എത്തിയ പ്രവർത്തകർ പോലീസിനെ പ്രകോപിപ്പിക്കുകയും, കൊടികെട്ടിയ വടികൾ, കുപ്പികൾ, റോഡിലെ കല്ലുകൾ എന്നിവ പോലീസിന് നേരെ വലിച്ചെറിയുകയും ചെയ്തു. പോലീസിനെ ലക്ഷ്യം വെച്ച് ബാരിക്കേഡിന് മുകളിലൂടെ നിരന്തരമായി കല്ലേറുണ്ടായി. ഇതിനെത്തുടർന്ന് സ്ഥിതിഗതികൾ ശാന്തമാക്കാൻ പോലീസ് പലതവണ ജലപീരങ്കി (Water Cannon) പ്രയോഗിച്ചു.
തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ, ശബരിമല വിഷയത്തിൽ ഒരു പുകമറ സൃഷ്ടിച്ച് രാഷ്ട്രീയ നേട്ടം ഉണ്ടാക്കാനുള്ള ആസൂത്രിതമായ ശ്രമമാണ് ഈ അക്രമ സമരത്തിന് പിന്നിലെന്ന് റിപ്പോർട്ടുകൾ വ്യക്തമാക്കുന്നു. സഭയിൽ ഈ വിഷയം ചർച്ച ചെയ്യാൻ അടിയന്തര പ്രമേയം അവതരിപ്പിക്കാൻ സർക്കാർ പ്രതിപക്ഷത്തെ വെല്ലുവിളിച്ചെങ്കിലും, അതിന് തയ്യാറാകാതെ സഭയെ പ്രക്ഷുബ്ധമാക്കാനാണ് പ്രതിപക്ഷം ശ്രമിച്ചത്. നിലവിൽ പോലീസ് ജലപീരങ്കി ഉപയോഗിച്ച് പ്രതിഷേധക്കാരെ നേരിടുകയും സമരത്തെ നിർവീര്യമാക്കാനുള്ള ശ്രമങ്ങൾ തുടരുകയുമാണ്.
