മന്ത്രവാദം നടത്തുന്നതിനിടെ പൊള്ളലേറ്റ യുവതി അത്യാസന്ന നിലയില്‍
നാദാപുരം: വിവാഹം നടക്കാത്തതിനെതുടര്‍ന്നു പരിഹാരമായി മന്ത്രവാദം നടത്തുന്നതിനിടെ പൊള്ളലേറ്റ യുവതി അത്യാസന്ന നിലയില്‍ കോഴിക്കോട് ആസ്പത്രിയില്‍ പ്രവേശിപ്പിച്ചു. കോഴിക്കോട് വെള്ളയില്‍ ഷെലീന(27)നെയാണ് സാരമായി പരിക്കേറ്റ നിലയില്‍ ആസ്പത്രിയില്‍ പ്രവേശിപ്പിച്ചത്. മന്ത്രവാദിയായ കുറ്റിയാടി ചുങ്കിയന്‍ കൊയിലോത്ത് തൂവോട്ട് പൊയില്‍ നജ്മ(37)നെ നാദാപുരം എസ്.ഐ.അഭിലാഷ് അറസ്റ്റ് ചെയ്തു.
ശനിയാഴ്ചയാണ് യുവതിക്ക് പൊള്ളലേറ്റത്. പോലീസില്‍ പരാതി നല്‍കിയതോടെയാണ് സംഭവം പുറം ലോകമറിയുന്നത്. രണ്ടാം വിവാഹം നടക്കാത്തതിനെ തുടര്‍ന്ന് ബന്ധുക്കളുടെ കൂടെയാണ് യുവതി പുറമേരിയിലെ വീട്ടിലെത്തിയത്. യുവതിയുടെ വീട്ടിനുള്ളിലെ കസേലയില്‍ ഇരുത്തി പര്‍ദ മാറ്റി മുടികെട്ട് അഴിച്ചുമാറ്റുകയായിരുന്നു.
തുടര്‍ന്ന് മന്ത്രവാദത്തിനായി ഒരുക്കിയ ഹോമകുണ്ഡത്തിലേക്ക് പെട്രോളൊഴിച്ചപ്പോള്‍ തീ ആളിപ്പടരുകയായിരുന്നു. മൂന്നു വര്‍ഷം മുമ്പ്‌ അടുക്കത്ത് നിന്നും സ്ത്രീ മന്ത്രവാദം നടത്തിയതായി പോലീസില്‍ വിവരം ലഭിച്ചിട്ടുണ്ട്. നിരവധി പേര്‍ സ്ത്രീയുടെ വലയില്‍ വീണിട്ടുണ്ട്. നല്ല പണം വാങ്ങിയാണ് സ്ത്രീ മന്ത്രവാദം നടത്തിയിരുന്നത്. തുടര്‍ന്ന് നാട്ടുകാര്‍ അവിടെ നിന്നു ഓടിച്ചു വിടുകയായിരുന്നു. അതിനുശേഷം വീടുകളില്‍ പോയി മന്ത്രവാദം നടത്തിയിരുന്നതായും പറയുന്നു. നിരവധി ഗള്‍ഫ് സ്ത്രീകളെ ഇത്തരത്തില്‍ വഞ്ചിച്ചതായി വിവരമുണ്ട്. എന്നാല്‍ മാനഹാനി ഭയന്ന് സംഭവം ആരും പുറത്തുപറയുന്നില്ല.
