ദക്ഷിണേന്ത്യന്‍ ശാസ്ത്രമേളയില്‍ മികച്ച നേട്ടവുമായി മലയാളി വിദ്യാര്‍ഥിനി
കോഴിക്കോട് > ദക്ഷിണേന്ത്യന്‍ ശാസ്ത്രമേളയില്‍ മികച്ച നേട്ടവുമായി മലയാളി വിദ്യാര്‍ഥിനി ഐഷ നോന. സതേണ്‍ ഇന്ത്യ സയന്‍സ് ഫെയര്‍ 2017ല്‍ വ്യക്തിഗത വിഭാഗത്തില്‍ കേരളത്തെ പ്രതിനിധാനംചെയ്ത ഐഷ നോന ഓവറോള്‍ ചാമ്ബ്യനായി. മേളയില്‍ അവതരിപ്പിച്ച ദ്രാവക മര്‍ദ്ദത്തെ സ്വാധീനിക്കുന്ന ഘടകങ്ങള്‍ സംബന്ധിച്ച പരീക്ഷണങ്ങള്‍ക്കാണ് അവാര്‍ഡ്. ഈ പരീക്ഷണത്തിന് സംസ്ഥാന ശാസ്ത്രമേളയിലും പുരസ്കാരം ലഭിച്ചിരുന്നു.
കേരളം, തമിഴ്നാട്, കര്‍ണാടക, ആന്ധ്ര, പോണ്ടിച്ചേരി സംസ്ഥാനങ്ങളില്‍നിന്ന് വ്യക്തിഗത ഇനത്തില്‍ പങ്കെടുത്ത 85 പേരില്‍നിന്നാണ് ഐഷ ഈ നേട്ടം കൈവരിച്ചത്. പോണ്ടിച്ചേരി വിവേകാനന്ദ ഹയര്‍ സെക്കന്‍ഡറി സ്കൂളില്‍ സംഘടിപ്പിച്ച മേളയില്‍ ട്രോഫിയും ക്യാഷ് അവാര്‍ഡും പുതുച്ചേരി വിദ്യാഭ്യാസ മന്ത്രി ആര്‍ കമലകണ്ണില്‍നിന്ന് ഐഷ ഏറ്റുവാങ്ങി.
പേരാമ്പ്ര സെന്റ് ഫ്രാന്‍സിസ് ഇംഗ്ളീഷ് മീഡിയം ഹൈസ്കൂളിലെ പത്താംതരം വിദ്യാര്‍ഥിനിയാണ്. പെരിങ്ങത്തൂര്‍ എന്‍എഎംഎച്ച്‌എസ് സ്കൂളിലെ അധ്യാപകന്‍ നടുവണ്ണൂര്‍ കരുവണ്ണൂര്‍ നടുകൊയിലോത്ത് അമീറിന്റെയും ഷര്‍ണിമയുടെയും മകളാണ്. സഹോദരന്‍: ഹയാന്‍ അബ്ദുള്ള നോനു.
