30 പവന്‍റെ സ്വര്‍ണാഭരണങ്ങളും 80,000 രൂപയും കവര്‍ന്ന സംഭവം: പ്രതിയുടേതെന്ന് കരുതുന്ന ചിത്രം പുറത്ത് വിട്ട് പോലീസ്
വൈപ്പിന്‍: ഓച്ചന്തുരുത്ത് സംസ്ഥാനപാതയ്ക്കരുകില്‍ റിട്ടയേര്‍ഡ് അധ്യാപകനായ തച്ചേരില്‍ ജോഷിയുടെ വീട്ടില്‍ നിന്ന് 30 പവന്‍റെ സ്വര്‍ണാഭരണങ്ങളും 80000 രൂപയും കവര്‍ന്ന സംഭവത്തില്‍ പോലീസ് അന്വേഷണം ഊര്‍ജിതം. മോഷ്ടാവ് വൈപ്പിന്‍കരക്ക് പുറത്തുള്ളയാളെന്നാണ് പോലീസ് സംശയിക്കുന്നത്. അതേ സമയം ഇയാള്‍ തെക്കന്‍മാലിപ്പുറം, സൗത്ത് പുതുവൈപ്പ്, മുരുക്കുംപാടം മേഖലയിലെവിടെയങ്കിലും വാടകക്ക് താമസിക്കുന്നയാളാണോയെന്നും പോലീസ് സംശയിക്കുന്നുണ്ട്. കൂടാതെ മട്ടാഞ്ചേരി, ഫോര്‍ട്ട്കൊച്ചി ഭാഗത്തേക്കും പോലീസിന്‍റെ അന്വേഷണം ഉണ്ട്.
28നു പകല്‍ സമയത്താണ് മോഷണം നടന്നിരിക്കുന്നത്. ഇന്നലെ പകലും രാത്രിയിലുമായി പോലീസ് നിരവധി പേരെ ചോദ്യം ചെയ്തിട്ടും പ്രതിയെക്കുറിച്ച്‌ മറ്റു സൂചനകളൊന്നും ലഭിക്കാത്ത സാഹചര്യത്തില്‍ പ്രതിയെന്ന് സംശയിക്കുന്നയാളുടെ സിസിടിവി ദൃശ്യം പോലീസ് പുറത്ത് വിട്ടിട്ടുണ്ട്. നീല ഷര്‍ട്ട് ധരിച്ച 45നു മേല്‍ പ്രായമുളള ഒരു മധ്യവയസ്കന്‍റെ ചിത്രമാണ് പോലീസ് പുറത്ത് വിട്ടിട്ടുള്ളത്. ഇടതുകൈയില്‍ സ്വര്‍ണനിറത്തിലുള്ള വാച്ച്‌ ധരിച്ചിട്ടുണ്ട്.
ഇരു നിറമാണ്. ഉയരം ഏതാണ്ട് അഞ്ചടിക്ക് മേലെയുണ്ട്. മോഷണം നടന്ന വീടിനു സമീപത്തുണ്ടായിരുന്ന സിസിടിവി കാമറയില്‍ നിന്നാണ് ഇയാളുടെ ചിത്രം ലഭിച്ചത്. മോഷ്ടാവിനെതേടി അന്വേഷണ സംഘം ഇന്നലെ പാതിരാത്രിവരെ വൈപ്പിന്‍ കരക്ക് അകത്തും പുറത്തും വ്യാപകമായ തെരച്ചില്‍ നടത്തിയെങ്കിലും പ്രതിയുടെ സങ്കേതം കണ്ടെത്താനായില്ല.
മുന് മോഷണക്കേസുകളിലെ പ്രതിയാണോയെന്ന് അറിയാന് സംസ്ഥാനത്ത് വിവിധ ജയിലുകളിലേക്കും പോലീസ് സ്റ്റേഷനുകളിലേക്കും സിസിടിവിയില് നിന്ന് ലഭിച്ച ചിത്രവും വിവരങ്ങളും ഞാറക്കല് പോലീസ് കൈമാറിയിട്ടുണ്ട്.
