കണ്ണൂരില്‍ നിന്നു മസ്കറ്റിലേക്ക് വിമാന സര്‍വീസ് തുടങ്ങി
കണ്ണൂരില്‍ നിന്നു മസ്കറ്റിലേക്ക് വിമാന സര്‍വീസ് തുടങ്ങി. നീണ്ട ഇടവേളകള്‍ക്ക് ശേഷമാണ് ഗള്‍ഫ് രാജ്യങ്ങളിലേക്ക് വിമാന സര്‍വീസ് പുനരാരംഭിച്ചിരിക്കുന്നത്. നാട്ടില്‍ കുടുങ്ങിയ പല പ്രവാസികളും തിരിച്ച്‌ പോകനുള്ള തയ്യാറെടുപ്പുകളിലാണ് ഇപ്പോള്‍.
നാല് മാസത്തെ ഇടവേളയ്ക്ക് ശേഷമാണ് കണ്ണൂരില്‍ നിന്ന് ഇന്ന് മുതല്‍ മസ്കറ്റിലേക്ക് വിമാന സര്‍വീസ് തുടങ്ങുന്നത്. എയര്‍ ഇന്ത്യ എക്സ്പ്രസ് ആണ് 129 ദിവസങ്ങള്‍ക്ക് ശേഷം സര്‍വീസ് നടത്തുന്നത്. എയര്‍ ബബിള്‍ ക്രമീകരണത്തിലൂടെ എയര്‍ ഇന്ത്യ എക്സ്പ്രസ് സര്‍വീസ് നടത്തുക. രാവിലെ 9.45ന് കണ്ണൂരില്‍ നിന്ന് പുറപ്പെട്ട് 11.25ന് മസ്കറ്റില്‍ എത്തുന്ന തരത്തിലാണ് വിമാനം പുറപ്പെടുന്നത്. തിങ്കള്‍, വ്യാഴം, ശനി ദിവസങ്ങളിലാണ് കണ്ണൂരില്‍ നിന്നും സര്‍വീസ്. ഒക്ടോബര്‍ പകുതി വരെ ടിക്കറ്റ് ബുക്കിങ് ഓപ്പണ്‍ ആണ്.
അതേസമയം, ടിക്കറ്റിന് ഉയര്‍ന്ന നിരക്ക് ഈടാക്കുന്നതിന് വലിയ പ്രതിഷേധം ആണ് യാത്രക്കാരുടെ ഇടയില്‍ നിന്നും ഉയര്‍ന്നു വരുന്നത്.ഏപ്രില്‍ 24 മുതലാണ് ഇന്ത്യയില്‍ നിന്നുള്ള വിമാനങ്ങള്‍ക്ക് മസ്കറ്റ് വിലക്ക് ഏര്‍പ്പെടുത്തിയിരുന്നത്. യാത്ര വിലക്ക് നീക്കി ആദ്യം വിമാന സര്‍വീസുകള്‍ തുടങ്ങിയത് യുഎഇ ആണ്. പിന്നീടാണ് മറ്റു ഗള്‍ഫ് രാജ്യങ്ങളിലേക്ക് വിമാന സര്‍വീസ് ആരംഭിച്ചതോടെ കണ്ണൂരില്‍ നിന്നും രാജ്യാന്തര വിമാന സര്‍വീസുകളും തുടങ്ങി. റഗുലര്‍ രാജ്യാന്തര സര്‍വീസ് തുടങ്ങാന്‍ ഡി ജി സി എ അനുമതി നല്‍കിയിട്ടില്ലെങ്കിലും വന്ദേഭാരത്, എയര്‍ ബബിള്‍ ക്രമീകരണം വഴിയാണ് വീണ്ടും സര്‍വീസുകള്‍ ആരംഭിച്ചത്. എയര്‍ ഇന്ത്യ, എയര്‍ ഇന്ത്യ എക്സ്പ്രസ് എന്നീ വിമാനങ്ങള്‍ ആണ് കൂടുതല്‍ ആയി സര്‍വീസ് നടത്തുന്നത്.
ഷാര്‍ജയിലേക്ക് ഇന്‍ഡിഗോ സര്‍വീസ് നടത്തുന്നുണ്ട്. കൂടാതെ ഷാര്‍ജ, അബുദാബി എന്നിവിടങ്ങളിലേക്ക് ഗോ ഫസ്റ്റും സര്‍വീസ് നടത്തുന്നുണ്ട്. ആഴ്ചയില്‍ ആറ് ദിവസമാണ് കണ്ണൂര്‍-ഷാര്‍ജ സര്‍വീസ് നടത്തുന്നത്. എന്നാല്‍ വെള്ളിയാഴ്ച സര്‍വീസ് ഉണ്ടായിരിക്കുകയില്ലെന്നും അധികൃതര്‍ അറിയിച്ചു.
10,000 മുതല്‍ 12,000 വരെയാണ് ടിക്കറ്റ് നിരക്ക്. കണ്ണൂര്‍- ദുബായ് സര്‍വീസ് ആഴ്ചയില്‍ നാല് ദിവസം ഉണ്ട്. ശനി ഞായര്‍, ചൊവ്വ, വ്യാഴം എന്നീ ദിവസങ്ങളിലാണ് സര്‍വീസ് നടത്തുന്നത്. 20,000 മുതല്‍ 29,000 വരെയാണ് ടിക്കറ്റ് നിരക്ക്. കണ്ണൂര്‍ -അബുദാബി സര്‍വീസ് ആഴ്ചയില്‍ ആറ് ദിവസമാണ്. തിങ്കള്‍ മാത്രം സര്‍വീസ് ഇല്ല. 16,000 രൂപ മുതല്‍ 20,000 വരെയാണ് ടിക്കറ്റ് നിരക്ക്. കൂടാതെ റിയാദിലേക്കും കുവൈറ്റിലേക്കും കണ്ണൂരില്‍ നിന്ന് സര്‍വീസ് ഉണ്ട്.
