സ്വന്തം മകളെ സര്‍ക്കാര്‍ അംഗന്‍വാടിയില്‍ ചേര്‍ത്ത് മറ്റുള്ളവര്‍ക്ക് മാതൃകയായി ആദ്യ വനിതാ കളക്ടര്‍
തിരുനെല്‍വേലി: കുട്ടികളെ ഏത് പ്ലേ സ്കൂളില്‍ ചേര്‍ക്കണമെന്നത് ഭൂരിഭാഗം രക്ഷിതാക്കളെയും അലട്ടുന്ന പ്രശ്നങ്ങളില്‍ ഒന്നാണ്. എന്നാല്‍ അത്തരം മാതാപിതാക്കളില്‍ നിന്നും വ്യത്യസ്തയാകുകയാണ് ഒരു കളക്ടര്‍. സ്വന്തം മകളെ സര്‍ക്കാര്‍ അംഗന്‍വാടിയില്‍ ചേര്‍ത്ത് മറ്റുള്ളവര്‍ക്ക് മാതൃകയായിരിക്കുകയാണ് തിരുനെല്‍വേലി ജില്ലാ കളക്ടര്‍ ശില്‍പ പ്രഭാകര്‍ സതീഷ്. പാളയംകോട്ടെയിലെ അംഗന്‍വാടിയിലാണ് കളക്ടര്‍ മകളെ ചേര്‍ത്തത്. തിരുനെല്‍വേലിയിലെ ആദ്യത്തെ വനിത കളക്ടറാണ് ശില്‍പ.
മകളെ അംഗന്‍വാടിയില്‍ ചേര്‍ത്തതില്‍ വളരെ സന്തോഷവതിയാണ് താനെന്ന് കര്‍ണ്ണാടക സ്വദേശിയായ കളക്ടര്‍ പറഞ്ഞു. ‘സമൂഹത്തിന്റെ വിവിധ മേഖലയില്‍ നിന്നുള്ള കുട്ടികളുമായി ഇടപഴകുന്നതിന് വേണ്ടിയും മറ്റുള്ളവരോട് എങ്ങനെ പെരുമാറണമെന്ന് പഠിപ്പിക്കുന്നതിനും വേണ്ടിയാണ് മകളെ പ്ലേ സ്കൂളില്‍ ചേര്‍ക്കാതെ അംഗന്‍വാടിയില്‍ ചേര്‍ത്തത്. കളക്‌ട്രേറ്റിന് സമ‌ീപമാണ് അംഗന്‍വാടി പ്രവര്‍ത്തിക്കുന്നത്. എല്ലാ സജ്ജീകരണങ്ങളും മികച്ച അധ്യാപകരുടെ സേവനവും ഇവിടെ ലഭ്യമാണ്’-ശില്‍പ പറയുന്നു.
ജില്ലയില്‍ ഏകദേശം ആയിരത്തോളം അംഗന്‍വാടികള്‍ പ്രവര്‍ത്തിക്കുന്നുണ്ട്. എല്ലായിടത്തും മികച്ച അധ്യാപകരും അടിസ്ഥാന സൗകര്യങ്ങളും ഉണ്ട്. ഒപ്പം എല്ലാ അംഗന്‍വാടികള്‍ക്കും സ്മാര്‍ട് ഫോണുണ്ട്. കുട്ടികളുടെ പൊക്കവും തൂക്കവും പരിശോധിക്കുന്നതിനും അരോഗ്യ നില വിലയിരുത്തുന്നതിനുമുള്ള അപ്ലിക്കേഷനുകള്‍ ഉള്ളവയാണ് ഫോണുകള്‍. കുട്ടികളുടെ വളര്‍ച്ചയ്ക്കും വികാസത്തിനും ആവശ്യമായ വേറെയും പദ്ധതികള്‍ ആരംഭിക്കാന്‍ ആലോചനയുണ്ടെന്നും ശില്‍പ കൂട്ടിച്ചേര്‍ത്തു.
