സെക്യൂരിറ്റി ജീവനക്കാരനെ മര്‍ദ്ദിച്ച സംഭവത്തില്‍ കൊയിലാണ്ടി സ്വദേശി അറസ്റ്റിൽ
കൊച്ചി: പാര്‍ക്കിംഗുമായി ബന്ധപ്പെട്ട തര്‍ക്കത്തെത്തുടര്‍ന്ന് സ്വകാര്യ ആശുപത്രിയിലെ സെക്യൂരിറ്റി ജീവനക്കാരനെ മര്‍ദ്ദിച്ച സംഭവത്തില്‍ യുവതി അറസ്റ്റില്‍. കോഴിക്കോട് കൊയിലാണ്ടി സ്വദേശി ആര്യ ബാലന്‍ (26) ആണ് അറസ്റ്റിലായത്. കളമശേരി കുസാറ്റ് അനന്യ കോളേജ് ഹോസ്റ്റലിലെ ജീവനക്കാരിയാണ് ആര്യ.
സ്റ്റേഷനില്‍ ഹാജരാകാന്‍ ആവശ്യപ്പെട്ടെങ്കിലും ആര്യ എത്താന്‍ വിസ്സമ്മതിച്ചു. തുടര്‍ന്ന് ഹോസ്റ്റലിലെത്തി അറസ്റ്റ് ചെയ്യുമെന്ന് പൊലീസ് അറിയിച്ചതോടെ, ആര്യ അഭിഭാഷകനൊപ്പം പൊലീസ് സ്റ്റേഷനിലേക്കെത്തുകയായിരുന്നു. സെഷന്‍ 323, 294 ബി, 506 (1) എന്നീ വകുപ്പുകള്‍ പ്രകാരമാണ് കേസെടുത്തിട്ടുള്ളത്. അകാരണമായി മര്‍ദിച്ചതിനും അസഭ്യം പറഞ്ഞതിനുമാണ് ഈ വകുപ്പുകള്‍ ചുമത്തിയിരിക്കുന്നത്.
ഒക്ടോബര്‍ ഒന്നിനായിരുന്നു കേസിനാസ്പദമായ സംഭവം.
രോഗിക്ക് സഹായിയായി ആശുപത്രിയിലെത്തിയ ആര്യ വലിയ വാഹനങ്ങള്‍ പാര്‍ക്ക് ചെയ്യുന്ന സ്ഥലത്ത് തന്റെ സ്‌കൂട്ടര്‍ പാര്‍ക്ക് ചെയ്തതിനാല്‍ സെക്യൂരിറ്റി ജീവനക്കാരന്‍ മാറ്റി വയ്പ്പിച്ചു. എന്നാല്‍ രോഗിയെ കണ്ട് മടങ്ങിവന്ന ആര്യ മറ്റ് വാഹനങ്ങള്‍ക്കിടയില്‍ പെട്ട തന്റെ സ്‌കൂട്ടര്‍ എടുത്തുതരണമെന്ന് ആവശ്യപ്പെടുകയായിരുന്നു.
ഇതനുസരിച്ച്‌ സ്‌കൂട്ടര്‍ പുറത്തെടുത്ത് നല്‍കിയപ്പോള്‍ സ്റ്റാന്‍ഡ് ഉരഞ്ഞെന്ന് പറഞ്ഞ് പ്രകോപിതയായി മുഖത്തടിക്കുകയും അസഭ്യം പറയുകയുമായിരുന്നു. ഇതിന്റെ വീഡിയോ സോഷ്യല്‍മീഡിയയില്‍ വൈറലായതിനെത്തുടര്‍ന്നാണ് പൊലീസ് കേസെടുത്തത്.
