സാഹിത്യകാരന്‍ എം സുകുമാരന്‍ അന്തരിച്ചു
തിരുവനന്തപുരം: സാഹിത്യകാരന്‍ എം സുകുമാരന്‍ അന്തരിച്ചു. തിരുവനന്തപുരം ശ്രീചിത്ര ആശുപത്രിയിലായിരുന്നു അന്ത്യം . 1976 ല്‍ അദ്ദേഹത്തിന്റെ മരിച്ചിട്ടില്ലാത്തവരുടെ സ്മാരകങ്ങള്‍ എന്ന കൃതിക്ക് കേരള സാഹിത്യ അക്കാദമി അവാര്‍ഡ് ലഭിച്ചു . 2006ല്‍ ചുവന്ന ചിഹ്നങ്ങള്‍ എന്ന ചെറുകഥാസമാഹാരത്തിനു കേന്ദ്ര സാഹിത്യ അക്കാദമി അവാര്‍ഡും തേടിയെത്തി .
1943 ല്‍ പാലക്കാട് ജില്ലയിലെ ചിറ്റൂരില്‍ നാരായണ മന്നാടിയാരുടെയും മീനാക്ഷിയമ്മയുടെയും മകനായാണ് എം സുകുമാരന്റെ ജനനം . ഹൈസ്കൂള്‍ പഠനത്തിന് ശേഷം വിദ്യാഭ്യാസം തുടരാതെ പഞ്ചസാര കമ്ബനിയിലും പിന്നീട് പ്രൈമറി സ്കൂള്‍ അദ്ധ്യാപകനായും ജോലി ചെയ്തു . കഥാകാരി രജനി മന്നാഡിയാര്‍ മകളാണ്
1963 ല്‍ തിരുവനന്തപുരം അക്കൗണ്ട് ജനറല്‍ ഓഫീസില്‍ ക്ലര്‍ക്ക് ജോലിയില്‍ പ്രവേശിച്ചെങ്കിലും 1971 ലെ ട്രേഡ് യൂണിയന്‍ പ്രവര്‍ത്തനങ്ങളുടെ ഭാഗമായി സര്‍വീസില്‍ നിന്നും പുറത്താക്കപ്പെട്ടു . സുകുമാരന്റെ സംഘഗാനം , ഉണര്‍ത്തുപാട്ട് എന്നീ കഥകള്‍ പിന്നീട് ചലച്ചിത്രമാക്കപ്പെട്ടു . പിതൃതര്‍പ്പണം 1992 ലെ മികച്ച ചെറുകഥയ്ക്കുള്ള പത്മരാജന്‍ പുരസ്കാരം നേടി. ജനിതകം എന്ന കൃതിക്ക് കേരള സാഹിത്യ അക്കാദമി അവാര്‍ഡ് ലഭിച്ചു. മികച്ച കഥയ്ക്കുള്ള ചലച്ചിത്ര അവാര്‍ഡ് (കേരള ഗവ.) 1981-ല്‍ ശേഷക്രിയയ്ക്കും 95-ല്‍ കഴകത്തിനും ലഭിച്ചു.
