യുവതി മരിച്ച സംഭവം; കാണാതായ ബന്ധുവിന്റെ മൃതദേഹം റയില്‍വേ ട്രാക്കില്‍
കൊല്ലം : യുവതി മരിച്ച വിവരം സുഹൃത്തിനെ വിളിച്ച്‌ അറിയിച്ച്‌ യുവാവ് ട്രെയിനു മുന്നില്‍ ചാടി മരിച്ചു. പുത്തൂര്‍ വെണ്ടാറില്‍ വാടകയ്ക്കു താമസിക്കുന്ന മുഴിക്കോട് സ്വദേശിനി സ്മിത (32)യെ ഇന്നു രാവിലെ വാടക വീട്ടിലാണ് മരിച്ച നിലയില്‍ കണ്ടെത്തിയത്. ഒളിവില്‍ പോയ കല്ലുംതാഴം കാഞ്ഞിരക്കാട്ടു വീട്ടില്‍ സനീഷിനെ (32) മണിക്കൂറുകള്‍ക്കകം കൊല്ലം നഗരത്തില്‍ റെയില്‍വേ ട്രാക്കില്‍ മരിച്ച നിലയില്‍ കണ്ടെത്തി.
യുവതിയുടെ ഭര്‍ത്താവ് ദീപേഷിന്റെ ബന്ധുവാണു സനീഷ്. യുവതിയുടെ വീട്ടില്‍ പതിവായി വരാറുള്ള സനീഷ് ഇന്നലെ രാത്രിയും എത്തിയിരുന്നു. ഇന്നു രാവിലെ സ്മിതയുടെ സുഹൃത്തിനെ ഫോണില്‍ വിളിച്ച്‌, സ്മിതയ്ക്ക് അസുഖമാണെന്നും പെട്ടെന്നു വരണമെന്നും അറിയിച്ചിരുന്നു. സുഹൃത്തും ഭര്‍ത്താവും വീട്ടിലെത്തിയപ്പോള്‍ സ്മിതയെ വീടിനുള്ളില്‍ മരിച്ച നിലയില്‍ കണ്ടെത്തുകയായിരുന്നു. മക്കളായ നീരജും നിരഞ്ജനും തൊട്ടടുത്ത മുറിയില്‍ ഉറങ്ങിക്കിടക്കുകയായിരുന്നു. കഴുത്തില്‍ സാരിയോ കയറോ മുറുക്കി കൊലപ്പെടുത്തിയതാകാമെന്നാണു പൊലീസ് നിഗമനം.
ഒളിവില്‍ പോയ സനീഷിനു വേണ്ടി പൊലീസ് തിരച്ചില്‍ നടത്തവെയാണ്, കൊല്ലം നഗരത്തില്‍ ഫാത്തിമാ മാതാ നാഷണല്‍ കോളജിനു സമീപത്തെ റെയില്‍വേ ട്രാക്കില്‍ ഇയാളുടെ മൃതദേഹം കണ്ടത്. മൃതദേഹം പോസ്റ്റുമോര്‍ട്ടത്തിനായി ജില്ലാ ആശുപത്രി മോര്‍ച്ചറിയിലേക്കു മാറ്റി.
