മീത്തലെ കുന്നോത്ത് പറമ്പില്‍ കോണ്‍ഗ്രസ് -സി പി എം സംഘര്‍ഷം: രണ്ട് സിപിഎം പ്രവര്‍ത്തകര്‍ക്ക് മര്‍ദ്ദനമേറ്റു
പാനൂര്‍: മീത്തലെ കുന്നോത്ത് പറമ്പില്‍ കോണ്‍ഗ്രസ് -സി പി എം സംഘര്‍ഷം. രണ്ട് സിപിഎം പ്രവര്‍ത്തകര്‍ക്ക് മര്‍ദ്ദനമേറ്റു. അക്രമികളെ വിരട്ടാന്‍ പോലീസ് ലാത്തി വീശി. ഇന്നലെ രാത്രിയിലാണ് സിപിഎം പ്രവര്‍ത്തകര്‍ക്ക് മര്‍ദനമേറ്റത്. ബൈക്കില്‍ സഞ്ചരിക്കുകയായിരുന്ന മീത്തലെ കുന്നോത്ത് പറമ്പിലെ ചാലുപറമ്പത്ത് ബാബുവിന്‍റെ മകന്‍ ചിക്കുയെന്ന അനുരാഗ് (18), ചക്കരേന്‍റവിട ദിലീഷ് (35) എന്നിവര്‍ക്കാണ് മര്‍ദ്ദനമേറ്റത്. പരിക്കേറ്റ ഇവരെ പാനൂര്‍ ഗവ.ആശുപത്രിയില്‍ പ്രവേശിപ്പിച്ചു.അക്രമവിവരമറിഞ്ഞ് സ്ഥലത്തെത്തിയ കൊളവല്ലൂര്‍ പോലീസ് സംഘടിച്ച സിപിഎം – കോണ്‍ഗ്രസ് പ്രവര്‍ത്തകരെ വിരട്ടിയോടിക്കാന്‍ ലാത്തി വീശി.
ഇന്നലെ മീത്തലെ കുന്നോത്ത് പറമ്പില്‍ കോണ്‍ഗ്രസ് ഓഫീസിനും വായനശാലയ്ക്കും തീയിട്ടിരുന്നു. അക്രമത്തില്‍ പങ്കില്ലെന്ന് സിപിഎം നേതാക്കള്‍ കോണ്‍ഗ്രസ് നേതാക്കളെ അറിയിക്കുകയും തീയിട്ട കോണ്‍ഗ്രസ് ഓഫീസ് സിപി എം നേതാക്കള്‍ സന്ദര്‍ശിക്കുകയും ചെയ്തു. സിപിഎം പ്രവര്‍ത്തകരാണ് കോണ്‍ഗ്രസ് ഓഫീസിനും വായനശാലയ്ക്കും തീയിട്ടതെന്നാണ് കോണ്‍ഗ്രസ് ആരോപിക്കുന്നത്. സംഭവത്തില്‍ കേസെടുത്ത് അന്വേഷണം നടത്തി വരികയാണ്. കോണ്‍ഗ്രസ് -സി പി എം സംഘര്‍ഷത്തെ തുടര്‍ന്ന് പ്രദേശത്ത് കനത്ത പോലീസ് കാവലേര്‍പ്പെടുത്തിയിട്ടുണ്ട്.
കോണ്‍ഗ്രസ് ഓഫീസിനും വായനശാലയ്ക്കും തീയിട്ട സംഭവത്തില്‍ പ്രതിഷേധിച്ച്‌ ഇന്നലെ കുന്നോത്ത് പറമ്പ് മേഖലയില്‍ ഹര്‍ത്താലാചരിക്കുകയും മീത്തലെ കുന്നോത്ത് പറമ്പില്‍ പ്രതിഷേധ പ്രകടനവും പൊതുയോഗവും നടത്തിയിരുന്നു. പൊതുയോഗം ഐ. എന്‍. ടി. യു. സി ദേശീയ സിക്രട്ടറി കെ സുരേന്ദ്രന്‍ ഉദ്ഘാടനം ചെയ്തു. കെ എസ് യു സംസ്ഥാന വൈസ് പ്രസിഡണ്ട് വി പി അബ്ദുള്‍ റഷീദ്, ടി കെ ചന്ദ്രന്‍ മാസ്റ്റര്‍, കെ പി രാമചന്ദ്രന്‍, കെ പി ഹാഷിം, കെ പി സാജു, പി പി രാജന്‍, എന്നിവര്‍ സംസാരിച്ചു.
