പ്രധാനമന്ത്രി കേരളത്തിലേക്ക്: ഗുരുവായൂര്‍ ക്ഷേത്രം സന്ദര്‍ശിക്കും
ദില്ലി: പ്രധാനമന്ത്രിയായി രണ്ടാമതും സത്യപ്രതിജ്ഞ ചെയ്ത് അധികാരമേറ്റെടുത്തതിന് തൊട്ടുപിന്നാലെ പ്രധാനന്ത്രി നരേന്ദ്രമോദി കേരളത്തിലേക്ക്. വരുന്ന ജൂണ്‍ എട്ട് ശനിയാഴ്ച പ്രധാനമന്ത്രി നരേന്ദ്രമോദി ഗുരുവായൂര്‍ ശ്രീകൃഷ്ണക്ഷേത്രം സന്ദര്‍ശിക്കും. ശനിയാഴ്ച ഉച്ചയ്ക്ക് 12 മണിയോടെ ക്ഷേത്രത്തില്‍ എത്തുന്ന പ്രധാനമന്ത്രി ഒരു മണിയോടെ ദര്‍ശനം നടത്തി മടങ്ങും. ക്ഷേത്രത്തിലെ വഴിപാടുകളെ കുറിച്ച്‌ അധികൃതരോട് ചോദിച്ചറിഞ്ഞിട്ടുണ്ട്. പ്രധാനമന്ത്രിയായ ശേഷം ആദ്യമായണ് മോദി ഗുരുവായൂര്‍ ക്ഷേത്രത്തിലെത്തുന്നത്.നേരത്തെ വര്‍ഷങ്ങള്‍ക്കു മുമ്പ് ഗുജറാത്ത് മുഖ്യമന്ത്രിയായിരിക്കെ ക്ഷേത്ര ദര്‍ശനം നടത്തിയിരുന്നു.
മോദിയുടെ സന്ദര്‍ശനവിവരം പ്രധാനമന്ത്രിയുടെ ഓഫീസാണ് ഗുരുവായൂര്‍ ദേവസ്വം ബോര്‍ഡ് അധികൃതരെ അറിയിച്ചത്. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും ഇതേദിവസം കേരളത്തില്‍ ഉണ്ടാവും. തന്നെ വന്‍ഭൂരിപക്ഷത്തിന് വിജയിപ്പിച്ച വയനാട്ടിലെ ജനങ്ങള്‍ക്ക് നന്ദി പറയാനായി ജൂണ്‍ 7,8 തീയതികളില്‍ മണ്ഡലം സന്ദര്‍ശിക്കുമെന്ന് രാഹുല്‍ ഗാന്ധി ഇന്നലെ അറിയിച്ചിരുന്നു.
