പി.എസ്.സി പരീക്ഷകള്‍ മലയാളത്തില്‍ നടത്താന്‍ സമ്മതമറിയിച്ച്‌ പി.എസ്.സി ചെയര്‍മാന്‍
തിരുവനന്തപുരം: പരീക്ഷകള്‍ ഇനി മുതല്‍ മലയാളത്തിലും നടത്താന്‍ തയ്യാറാണെന്ന് അറിയിച്ച്‌ പി.എസ്.സി ചെയര്‍മാന്‍ എം.കെ സക്കീര്‍. പി.എസ്.സി പരീക്ഷകള്‍ എല്ലാം മലയാളത്തിലും നടത്തണമെന്നാവശ്യപ്പെട്ട് ഐക്യമലയാള പ്രസ്ഥാനം നിരാഹാര സമരം നടത്തുന്ന പശ്ചാത്തലത്തില്‍ മുഖ്യമന്ത്രിയുമായുള്ള ചര്‍ച്ചയ്ക്ക് ശേഷം മാധ്യമങ്ങളോട് സംസാരിക്കുകയായിരുന്നു പി.എസ്.സി ചെയര്‍മാന്‍.
പി.എസ്.സിയുടെ കീഴില്‍ നടത്തുന്ന മുഴുവന്‍ പരീക്ഷകളും മലയാളത്തിലുമാക്കാമെന്ന നിലപാടാണ് മുഖ്യമന്ത്രിയുമായുള്ള യോഗത്തില്‍ പി.എസ്.സി ചെയര്‍മാന്‍ അറിയിച്ചത്. ഇതിനായുള്ള പ്രായോഗിക നടപടികള്‍ ചര്‍ച്ച ചെയ്ത് തീരുമാനിക്കുമെന്നും എല്ലാ സര്‍വകലാശാലാ വൈസ് ചാന്‍സലര്‍മാരുടെയും യോഗം വിളിക്കുമെന്നും ചര്‍ച്ച കഴിഞ്ഞ് പുറത്തിറങ്ങിയ പിഎസ്സി ചെയര്‍മാന്‍ മാധ്യമങ്ങളോട് പറഞ്ഞു.
ഇതിന്റെ പ്രായോഗിക വശങ്ങള്‍ പരിശോധിക്കുന്നതിനായി സര്‍വകലാശാല അധ്യാപകര്‍ ഉള്‍പെടെയുള്ളവരടങ്ങുന്ന ഒരു സമിതി രൂപീകരിക്കാന്‍ യോഗത്തില്‍ തീരുമാനമായി.
വിഷയത്തില്‍ പി.എസ്.സി നേരത്തെ ഉന്നയിച്ചിരുന്ന തടസ്സ വാദങ്ങളെല്ലാം ഇപ്പോള്‍ പിന്‍വലിച്ചിരിക്കുകയാണ്. ഇതോടെ പി.എസ്.സി ആസ്ഥാനത്ത് ഐക്യമലയാള പ്രസ്ഥാനം നടത്തി വന്ന സമരം ഏതാണ്ട് വിജയം കണ്ടിരിക്കുകയാണ്.
