പാലക്കാട് സി.പി.എം- ഡി.വൈ.എഫ്.ഐ പ്രവര്‍ത്തകര്‍ക്ക് വെട്ടേറ്റു
പാലക്കാട്: സി.പി.എം- ഡി.വൈ.എഫ്.ഐ പ്രവര്‍ത്തകര്‍ക്ക് വെട്ടേറ്റു. ഇരട്ടക്കുളത്ത് ചന്ദ്രന്റെ മകന്‍ രതീഷ്(30) കാസിമിന്റെ മകന്‍ യൂസുഫ്(31),സുധീഷ്( 28) എന്നിവര്‍ക്കാണ് പരിക്കേറ്റത്. ഇവരെ സമീപത്തെ സ്വകാര്യ ആശുപത്രിയില്‍ പ്രവേശിപ്പിച്ചു. വ്യാഴാഴ്ച രാത്രിയോടെയാണ് സംഭവം. മാരകായുധങ്ങളുമായി ബൈക്കിലത്തിയ സംഘം വീട്ടില്‍ കയറിയാണ് മൂവരേയും വെട്ടിയത്.
അക്രമികളില്‍ ചിലര്‍ തൂവാല കൊണ്ട് മുഖം മറച്ചിരുന്നു. രതീഷിനെ രക്ഷിക്കാനുള്ള ശ്രമത്തിനിടെ അമ്മ ശെല്‍വിക്കും പരിക്കേറ്റിട്ടുണ്ട്. രതീഷിന്റെ കൈവിരലുകള്‍ മുറിഞ്ഞ് തൂങ്ങിയ നിലയിലാണ്‌ ആശുപത്രിയില്‍ പ്രവേശിപ്പിച്ചത്.
കഴിഞ്ഞ ദിവസം പരുക്കഞ്ചേരിയില്‍ ഉത്സവത്തിനിടെ ഇരുവിഭാഗങ്ങള്‍ തമ്മില്‍ സംഘര്‍ഷമുണ്ടായിരുന്നു. ഇതിന്റെ തുടര്‍ച്ചാണ് അക്രമമെന്നാണ് പൊലീസ് കരുതുന്നത്. സംഭവത്തിന് പിന്നില്‍ ബി.ജെ.പി ആര്‍.എസ്.എസ് പ്രവര്‍ത്തകരാണെന്ന് സി.പി.എം ആരോപിച്ചു. എന്നാല്‍ സംഭവത്തില്‍ പങ്കില്ലെന്ന് ബി.ജെ.പി മണ്ഡലം കമ്മറ്റിവ്യക്തമാക്കി. സംഘര്‍ഷത്തെ തുടര്‍ന്ന് എ.എസ്.പി ജി.പൂങ്കഴലിയുടെ നേതൃത്വത്തിലുള്ള പൊലീസ് സംഘം സ്ഥലത്തത്തെി സുരക്ഷ ശക്തമാക്കി.
