തെരഞ്ഞെടുപ്പിന്‍റെ മറവില്‍ നടന്ന അനധികൃത നിലംനികത്തല്‍
ആലപ്പുഴ: ആലപ്പുഴ പുറക്കാട് തെരഞ്ഞെടുപ്പിന്‍റെ മറവില്‍ നടന്ന വന്‍ അനധികൃത നിലംനികത്ത് റവന്യൂ ഉദ്യോഗസ്ഥര്‍ തടഞ്ഞു. അമ്പലപ്പുഴയിലെ അഞ്ചേക്കറിലേറെ നിലവും തോടുമാണ് ജെസിബിയുടെ സഹായത്തോടെ നികത്തിത്തുടങ്ങിയത്. നിലംനികത്താന്‍ ഉപയോഗിച്ച ജെസിബിയും പിടിച്ചെടുത്തു.
രണ്ടാഴ്ച മുമ്പാണ് പുറക്കാട് പഞ്ചായത്തിലെ രണ്ടാംവാര്‍ഡിലെ വിളപ്പില്‍ ഭാഗം എന്ന പ്രദേശത്ത് നിലംനികത്താന്‍ തുടങ്ങിയത്. റവന്യൂ രേഖകളില്‍ നിലം എന്ന് രേപ്പെടുത്തിയ ഈ ഭൂമിയിലൂടെ ഒരു ചെറുതോടും ഒഴുകുന്നുണ്ട്. ഇവിടെ മണ്ണിട്ട് ഉയര്‍ത്തുന്നത് ശ്രദ്ധയില്‍പ്പെട്ട നാട്ടുകാര്‍ പരാതി നല്‍കിയതോടെ ഈ മാസം പതിനൊന്നിന് പുറക്കാട് വില്ലേജ് ഓഫീസര്‍ സ്റ്റോപ്പ് മെമ്മോ കൊടുത്തിരുന്നു.
സ്റ്റോപ്പ് മെമ്മോ വകവയ്ക്കാതെ വീണ്ടും നികത്ത് തുടര്‍ന്നപ്പോള്‍ സബ് കളക്ടര്‍ കൃഷ്ണ തേജ ഐഎഎസ്സും പുറക്കാട് വില്ലേജ് ഓഫീസറുമെത്തി നികത്ത് തടഞ്ഞ് ജെസിബി കസ്റ്റഡിയിലെടുക്കുകയായിരുന്നു. ജെസിബി പൊലീസിന് കൈമാറി. നെല്‍വയല്‍ നീര്‍ത്തട സംരക്ഷണ നിയമമനുസരിച്ച്‌ നടപടി എടുക്കുന്നതിനൊപ്പം കുറ്റക്കാര്‍ക്കെതിരെ ക്രിമിനല്‍ നടപടിയെടുക്കാനുള്ള സാധ്യത തേടുമെന്ന് സബ്കലക്ടര്‍ കൃഷ്ണ തേജ ഐ എ എസ് പറഞ്ഞു.
