തെച്ചിക്കോട്ട്കാവ് രാമചന്ദ്രന് ഇടഞ്ഞാല് ഉത്തരവാദപ്പെട്ടവര് മറുപടി പറയേണ്ടിവരും: വി എസ് സുനില്കുമാര്
തൃശൂര്: തൃശൂര് പൂരത്തില് തെച്ചിക്കോട്ട്കാവ് രാമചന്ദ്രനെ വിലക്കിയ സംഭവത്തില് പ്രതികരണവുമായി മന്ത്രി വി എസ് സുനില്കുമാര്. തെച്ചിക്കോട്ട് രാമചന്ദ്രനെ വിലക്കിയത് ജില്ലാ കലക്ടറാണ്. സര്ക്കാരിന് ഇക്കാര്യത്തില് നിര്ബന്ധബുദ്ധിയില്ല. ഇക്കാര്യം കോടതിയില് വ്യക്തമാക്കുമെന്നും മന്ത്രി തൃശൂരില് പറഞ്ഞു.
തെച്ചിക്കോട്ടുകാവ് രാമചന്ദ്രനെ തൃശൂര് പൂരത്തിന് എഴുന്നള്ളിക്കണമെന്ന് കോടതി പറഞ്ഞാല് സര്ക്കാര് എതിര്ക്കില്ല. പക്ഷെ എഴുന്നള്ളിപ്പിനിടെ ആന ഇടഞ്ഞാല് ഉത്തരവാദപ്പെട്ടവര് മറുപടി പറയേണ്ടിവരുമെന്നും മന്ത്രി സുനില്കുമാര് മുന്നറിയിപ്പ് നല്കി.
തെച്ചിക്കോട്ടുകാവ് രാമചന്ദ്രനെ വിലക്കിയതിനെതിരായ ഹര്ജി ഹൈക്കോടതി നാളെ പരിഗണിക്കാനിരിക്കെയാണ് മന്ത്രി സര്ക്കാര് നിലപാട് വ്യക്തമാക്കിയിരിക്കുന്നത്. തൃശൂര് കളക്ടര് അധ്യക്ഷയായ നാട്ടാന നിരീക്ഷക സമിതിയുടെ വിലക്ക് ചോദ്യം ചെയ്ത് തെച്ചിക്കോട് കാവ് ദേവസ്വം നല്കിയ ഹര്ജിയാണ് നാളെ ഹൈക്കോടതി പരിഗണിക്കുന്നത്.
പന്ത്രണ്ട് പേരെ കൊലപ്പെടുത്തുകയും കാഴ്ച ഇല്ലാതാവും ചെയ്ത ആന സുരക്ഷാ പ്രശനങ്ങള് ഉണ്ടാക്കുമെന്ന് കണ്ടെത്തിയതിന്റെ അടിസ്ഥാനത്തിലാണ് കളക്ടര് ടി വി അനുപമ അധ്യക്ഷയായ ജില്ലാ നിരീക്ഷക സമിതി തെച്ചിക്കോട്ട് കാവ് രാമചന്ദ്രനെ പൂരം എഴുന്നെള്ളിപ്പില് നിന്നും വിലക്കിയത്. ഇത് ചോദ്യം ചെയ്താണ് തെച്ചിക്കോട്ടുകാവ് ദേവസ്വം ഉടമകള് ഹൈക്കോടതിയെ സമീപിച്ചിരിക്കുന്നത്.
വര്ഷങ്ങളായി നെയ്തലക്കാവ് ഭഗവതിയുടെ തിടമ്ബെടുത്ത് തെക്കേ ഗോപുര നട തള്ളിത്തുറന്ന് പൂര വിളമ്ബരം ചെയ്യുന്നത് തെച്ചിക്കോട്ടുകാവ് രാമചന്ദ്രനാണ്. പൂരത്തിനിടയില് ആന ഒരിക്കല് പോലും ആക്രമം കാണിച്ചിട്ടില്ല. കാഴ്ച ഇല്ല എന്ന മോണിറ്ററിംഗ് കമ്മിറ്റിയുടെ വാദത്തിന് ശാസ്ത്രീയ പിന്ബലമില്ല. രണ്ട് കണ്ണിനും കാഴ്ചയില്ലെന്ന് ഒരു ഡോക്ടര്മാരും പരിശോധിച്ച് ഉറപ്പ് വരുത്തിയിട്ടില്ല. ഈ സാഹചര്യത്തില് തെച്ചിക്കോട്ടുകാവ് രാമചന്ദ്രനെ വിലക്കുന്നതിന് പിന്നില് ഗൂഢാലോചന ഉള്ളതായി സംശയിക്കുന്നുവെന്നാണ് ആന ഉടമകളുടെ വാദം.
അതേസമയം, തൃശൂര് പൂരം അനുബന്ധിച്ച് ആനകളുടെ എഴുന്നള്ളിപ്പില് കര്ശന നിലപാടുകളില് ഉറച്ച് നില്ക്കുകയാണ് തൃശൂര് കളക്ടര് ടി വി അനുപമ. മെയ് 12 മുതല് 14 വരെ നീരുള്ളതും അപകടാവസ്ഥയിലുള്ളതും ശബ്ദം കേട്ടാല് വിരണ്ടോടുന്നതുമായ ആനകള്ക്ക് വിലക്ക് ഏര്പ്പെടുത്തിയിട്ടുണ്ടെന്ന് അനുപമ അറിയിച്ചു.