ജൈന ദമ്പതിമാര്‍ പിഞ്ചു മകളെയും നൂറു കോടി വരുന്ന സ്വത്തും ഉപേക്ഷിച്ച്‌ സന്യസിക്കുന്നു
ഭോപാല്‍: മധ്യപ്രദേശില്‍ നിന്നുള്ള ജൈന ദമ്പതിമാര്‍ മൂന്നു വയസുകാരിയായ മകളെയും 100കോടിയോളം മൂല്യം മതിക്കുന്ന സ്വത്തുക്കളും ഉപേക്ഷിച്ച്‌ സന്യസിക്കുന്നു.
സുമിത് റാത്തോഡ് (35), ഭാര്യ അനാമിക (34) എന്നിവരാണ് സന്യാസത്തിന്റെ ആദ്യപടിയായ ദീക്ഷ സ്വീകരിക്കാന്‍ തയാറെടുക്കുന്നത്. സെപ്തംബര്‍ 23ന് ഗുജറാത്തിലെ സൂറത്തില്‍ ജൈന ആചാര്യന്‍ രാംലാല്‍ മഹാരാജില്‍ നിന്ന് ദീക്ഷ സ്വീകരിക്കും.
പാരമ്പര്യമായി രാഷ്ട്രീയക്കാരും വ്യാപാരികളുമാണ് ദമ്പതികളുടെ കുടംബം. ദമ്പതികളുടെ മകള്‍ മൂന്നു വയസുകാരി ഇഭ്യയെ അനാമികയുടെ പിതാവ് അശോക് ചണ്ഡാലിയ പരിരക്ഷിക്കുമെന്ന് അറിയിച്ചു. ഒരാളുടെയും മതപരമായ ആഗ്രഹങ്ങളെ തടഞ്ഞു നിര്‍ത്താന്‍ ആര്‍ക്കും സാധിക്കില്ലെന്ന് അനാമികയുടെ പിതാവ് പറഞ്ഞു. തങ്ങള്‍ ഇൗ തീരുമാനം പ്രതീക്ഷിച്ചിരുന്നെന്നും എന്നാല്‍ ഇത്രപെെട്ടന്ന് ഉണ്ടാകുമെന്ന് കരുതിയിരുന്നില്ലെനും സുമിതിന്റെ പിതാവും വ്യാപാരിയുമായ രാജേന്ദ്ര സിങ് റാത്തോഡ് പറഞ്ഞു.
നാലു വര്‍ഷം മുമ്പ്‌ വിവാഹിതരായ ദമ്പതികള്‍ കുഞ്ഞിന് എട്ടുമാസം മാത്രം പ്രായമുണ്ടായിരുന്നപ്പോള്‍ സന്യാസം സ്വീകരിക്കാന്‍ ആഗ്രഹമുണ്ടെന്ന് പ്രഖ്യാപിച്ചിരുന്നു. അതിനു ശേഷം അകന്നു താമസിക്കുകയായിരുന്നു ഇരുവും. ഇനി ദീക്ഷ സ്വീകരിക്കും വരെ ഇരുവരും മൗനവ്രതത്തിലായിരിക്കും.
