ജിഷ്ണു കേസില്‍ തിരിച്ചടി; രക്തസാമ്പിളില്‍ നിന്നും ഡിഎന്‍എ വേര്‍തിരിക്കാനാകില്ല
തിരുവനന്തപുരം: ജിഷ്ണു പ്രണോയ് കേസില്‍ നിര്‍ണായക തെളിവായി കണ്ടെത്തിയ രക്തക്കറയില്‍ നിന്ന് ഡി.എന്‍.എ വേര്‍തിരിച്ചെടുക്കാനായില്ല. ജിഷ്ണു പഠിച്ച നെഹ്റു എന്‍ജിനീയറിങ് കോളജിലെ ഇടിമുറിയില്‍ നിന്നും ലഭിച്ച രക്തക്കറയാണ് ഡി.എന്‍.എ പരിശോധനക്ക് അയച്ചത്. കണ്ടെത്തിയ സാമ്പിളില്‍ പരിശോധന സാധ്യമല്ലെന്ന് തിരുവനന്തപുരം ഫോറന്‍സിക് ലാബ് റിപ്പോര്‍ട്ട് നല്‍കി. റിപ്പോര്‍ട്ട് പൊലീസിന് കൈമാറിയിട്ടുണ്ട്.
പഴക്കവും ആവശ്യത്തിനുള്ള അളവിലും രക്ത സാമ്പിള്‍ ലഭിക്കാതിരുന്നതാണ് ഡി.എന്‍.എ വേര്‍തിരിക്കാന്‍ സാധിക്കാതിരുന്നത് എന്നാണ് തിരുവനന്തപുരം ഫോറന്‍സിക് ലാബ് അധികൃതര്‍ പറയുന്നത്. നേരത്തെ നടത്തിയ പരിശോധനയില്‍ കണ്ടെത്തിയ രക്തക്കറ ജിഷ്ണവിന്റെ രക്ത ഗ്രൂപ്പായ ഒ-പോസിറ്റീവാണെന്ന് തെളിഞ്ഞിരുന്നു. തുടര്‍ന്ന് അന്വേഷണ സംഘം നാദാപുരത്തെത്തി ജിഷ്ണവിന്റെ മാതാപിതാക്കളുടെ ഡി.എന്‍.എ ശേഖരിച്ചിരുന്നു.
