ചെരണ്ടത്തൂരില്‍ ജപ്പാന്‍ജ്വരം ബാധിച്ച്‌ സ്ത്രീ മരിച്ചു
വടകര: മണിയൂര്‍ പഞ്ചായത്തിലെ ചെരണ്ടത്തൂരില്‍ ജപ്പാന്‍ജ്വരം ബാധിച്ച്‌ സ്ത്രീ മരിച്ചു. ചെറിയ ആറ്റുപുറത്ത് കുഞ്ഞിപ്പാത്തു (68) ആണ് മരിച്ചത്. മേയ് 26-നാണ് ഇവരെ ശക്തമായ തലവേദന, ഛര്‍ദി, ബോധക്ഷയം എന്നീ ലക്ഷണങ്ങളുമായി കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചത്. ആരോഗ്യനിലയില്‍ വ്യത്യാസമില്ലാതെ വന്നതോടെ ഈ മാസം രണ്ടിന് കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി.
തുടര്‍ന്ന് നട്ടെല്ലില്‍നിന്ന് ദ്രവം കുത്തിയെടുത്ത് മണിപ്പാലിലെ സെന്റര്‍ ഫോര്‍ വൈറസ് റിസര്‍ച്ച്‌ സെന്ററിലേക്ക് പരിശോധനയ്ക്ക് അയച്ചു. തിങ്കളാഴ്ചയാണ് ഇവര്‍ മരിച്ചത്. രാത്രിയോടെ മരണകാരണം ജപ്പാന്‍ജ്വരമാണെന്ന് സ്ഥിരീകരിക്കുന്ന പരിശോധനാഫലം മണിപ്പാലില്‍നിന്ന് കിട്ടി.
ഇവര്‍ താമസിക്കുന്ന ചെരണ്ടത്തൂരിലും പരിസരങ്ങളിലും ആരോഗ്യവകുപ്പ് പ്രതിരോധനടപടികള്‍ ഊര്‍ജിതമാക്കി. ക്യൂലക്സ് വിഭാഗത്തില്‍പെട്ട കൊതുക് പരത്തുന്ന വൈറസ് രോഗമാണിത്. ഈ വിഭാഗത്തില്‍ പെട്ട കൂത്താടികളെ ചെരണ്ടത്തൂരില്‍ കണ്ടെത്തിയിട്ടുണ്ട്. പന്നികളും ജലപക്ഷികളുമാണ് വൈറസിന്റെ വാഹകര്‍.
ചെരണ്ടത്തൂര്‍ ചിറയിലും പരിസരങ്ങളിലും ഒട്ടേറെ ദേശാടനപ്പക്ഷികള്‍ എത്താറുണ്ട്. സമീപത്തൊന്നും പന്നികള്‍ ഇല്ലാത്തതിനാല്‍ പക്ഷികള്‍ വഴിയാണ് വൈറസ് ഇവിടെ എത്തിയതെന്ന സംശയത്തിലാണ് ആരോഗ്യവകുപ്പ്. ഭീതിവേണ്ടെന്നും കൊതുകുനശീകരണം ഉറപ്പുവരുത്തണമെന്നും ആരോഗ്യവകുപ്പ് അറിയിച്ചു. അലിയാണ് കുഞ്ഞിപ്പാത്തുവിന്റെ ഭര്‍ത്താവ്.
