ചലച്ചിത്ര താരം നിവിന്‍ പോളി 25 ലക്ഷം രൂപ സംഭാവന നല്‍കി
തിരുവനന്തപുരം: മുഖ്യമന്ത്രിയുടെ ദുരിതാശ്വാസ നിധിയിലേക്ക്‌ ചലച്ചിത്ര താരം നിവിന്‍ പോളി 25 ലക്ഷം രൂപ സംഭാവന നല്‍കി. തുകയടങ്ങുന്ന ചെക്ക്‌ നിവിന്‍ പോളി മുഖ്യമന്ത്രി പിണറായി വിജയന്‌ കൈമാറി. പി രാജീവ്‌ ഒപ്പമുണ്ടായിരുന്നു. ദുരിതാശ്വാസ നിധിയിലേക്ക്‌ എല്ലാവരും സംഭാവന നല്‍കണമെന്ന്‌ അഭ്യര്‍ഥിച്ച നിവിന്‍ സര്‍ക്കാരിന്റെ ദുരിതാശ്വാസ ഏകോപനത്തെ പ്രശംസിച്ചു.
വളരെ നന്നായിട്ടാണ്‌ സര്‍ക്കാര്‍ ഈ കാര്യങ്ങള്‍ ഏറ്റെടുത്തു നടത്തുന്നത്‌. ദുരിതാശ്വാസ ഫണ്ടിലേക്ക്‌ എല്ലാവരും കഴിയുന്നപോലെ സംഭാവന ചെയ്യണം. വീടുകളും എല്ലാ സമ്ബാദ്യവും നഷ്‌ടപ്പെട്ട ദുരിതബാധിതരെ ജീവിതത്തിലേക്ക്‌ കൈപിടിച്ചുയര്‍ത്താന്‍ പൊതുജനങ്ങളുടെ കൂടി സഹായം ആവശ്യമാണ്‌ നിവിന്‍ പറഞ്ഞു.
കേരളത്തിന്റെ പുനര്‍നിര്‍മിതിക്ക്‌ ഒരുമയോടെയുള്ള പ്രവര്‍ത്തനം ആവശ്യമാണെന്നും അദ്ദേഹം പറഞ്ഞു. ചലച്ചിത്ര രംഗത്ത്‌ നിന്ന്‌ പലരും ദുരിതാശ്വാസത്തിന്‌ സഹായിക്കുന്നുണ്ട്‌. പലരും പുറത്ത്‌ പറയാതെ തന്നെ തങ്ങളാല്‍ കഴിയുന്ന സഹായങ്ങള്‍ ചെയ്യുന്നുണ്ടെന്നും നിവിന്‍ പോളി പറഞ്ഞു.
