കൊയിലാണ്ടിയിൽ ശുചീകരണ യജ്ഞത്തിന് പ്രൌഡമായ തുടക്കം
കൊയിലാണ്ടി: ഗാന്ധിജയന്തി ദിനത്തോടനുബന്ധിച്ച് നഗരസഭയും ആരോഗ്യ വിഭാഗവും നടത്തുന്ന 7 ദിവസത്തെ ശുചീകരണ യജ്ഞത്തിന് ഇന്ന് തുടക്കമായി. കൊയിലാണ്ടി പുതിയ ബസ്സ് സ്റ്റാന്റെ് പരിസരത്ത് നടന്ന പ്രൗഡമായ ചടങ്ങിൽ നിരവധിപേർ അണിനിരന്നു.
നഗരസഭാ ചെയർമാൻ അഡ്വ: കെ. സത്യൻ പരിപാടി ഉദ്ഘാടനം ചെയ്തു. കൊയിലാണ്ടി പോലീസ്, ഫയർ യൂണിറ്റ്, വിവിധ സന്നദ്ധ സംഘടനാ പ്രതിനിധികൾ, വ്യാപാരികൾ, മീഡിയാ ക്ലബ്ബിന്റെ നേതൃത്വത്തിൽ മാധ്യമ പ്രവർത്തകർ, കൗൺസിലർമാർ, പാർലമെന്ററി പാർട്ടി ലീഡർമാർ തുടങ്ങിയവർ ശുചീകരണ യജ്ഞത്തിന് നേതൃത്വം നൽകി.
7 ദിവസങ്ങളിലലായി നീണ്ടു നിൽക്കുന്ന പരിപാടിയിൽ ദിവസവും വിവിധ മേഖലകളിൽ ശുചീകരിക്കുന്നതിന് വേണ്ടിയാണ് പദ്ധതി തയ്യാറാക്കിയതെന്ന് ആരോഗ്യ സ്റ്റാന്റിംഗ് കമ്മിറ്റി ചെയർമാൻ വി. സുന്ദരൻ മാസ്റ്റർ സ്വാഗത പ്രസംഗത്തിലൂടെ പറഞ്ഞു.
നഗരസഭയെ സമ്പൂർണ്ണ മാലിന്യ രഹിത നഗരമാക്കാനുള്ള ബൃഹത്തായ പരിപാടികൾക്ക് പരിപാടി തയ്യാറാക്കിയിട്ടിണ്ട്. ഇതിന്റെ ഭാഗമായി അടുത്ത ആഴ്ച നഗരത്തിൽ മുഴുവൻ കടകളിലും കൊയിലാണ്ടി എം. ജി. കോളജിലെ ഡിഗ്രി വിദ്യാർത്ഥികൾ സർവ്വെ നടത്തും. അവർക്കുള്ള പരിശീലനം നൽകിക്കഴിഞ്ഞു.
കടകളിൽ നിന്നും വീടുകളിൽ നിന്നും യൂസർ ഫീ ഈടാക്കിക്കൊണ്ട് മാലിന്യ സംസ്‌ക്കരണത്തിന് രാം ബയോളജിക്കൽ കോഴിക്കോടിനെയും, ഗ്രീൻ വേംസ് കോഴിക്കോടിനെയും ഇതിനകം ചുമതലപ്പെടുത്തിക്കഴിഞ്ഞു. ഹെൽത്ത് ഇൻസ്‌പെക്ടർമാരായ കെ. എം. പ്രസാദിന്റെയും, കെ. സുബൈറിന്റെയും നേതൃത്വത്തിൽ നൈറ്റ് പട്രോളിംഗ് നടത്തിവരുന്നുണ്ട്.
3-ാം തിയ്യതി ചൊവ്വാഴ്ച കടലോര ശുചീകരണം, 4 ന് വിവിധ മാർക്കറ്റുകളും, 5 ന് നഗരസഭാ പരിധിയിലെ മുഴുവൻ സ്ഥാപനങ്ങളും, 6 ന് വിദ്യാലയങ്ങളിലും, സ്ഥാപനങ്ങളിലുമുള്ള പൊതു സ്ഥലങ്ങളിലുമുള്ള ശുചി മുറികളും, വൃത്തിയാക്കും. 7 ന് നഗരസഭയിലെ അലോപ്പതി, ആയുർവ്വേദ, ഹോമിയോ ആശുപത്രികളിൽ ശുചീകരണം നടത്തും. സ്വാകാര്യ ആശുപത്രികളും പ്രവർത്തനത്തിൽ പങ്കാളികളവണമെന്നും, 8 ന് മുഴുവൻ വാർഡുകളിലും ശുചീകരണം പ്രവർത്തനം നടക്കുമെന്നും അദ്ധേഹം പറഞ്ഞു.
ചടങ്ങിൽ വൈസ് ചെയർമാൻ വി. കെ. പത്മനിനി, സ്റ്റാന്റിംഗ് കമ്മിറ്റി ചെയർമാൻമാരായ കെ. ഷിജു, എൻ. കെ. ഭാസ്‌ക്കരൻ, വി. കെ. അജിത, വി. പി. ഇബ്രാഹിംകുട്ടി, പോലീസ് സർക്കിൾ ഇൻസ്‌പെക്ടർ, നഗരസഭാ ഹെൽത്ത് വിഭാഗം ഉദ്യോഗസ്ഥർ, വ്യാപാരി വ്യവസായി നേതാക്കൾ തുടങ്ങിയവർ ചടങ്ങിന് നേതൃത്വം നൽകി.
