കൊയിലാണ്ടിയിൽ ഒന്നര ലക്ഷത്തോളം രൂപയുടെ പുകയില ഉൽപ്പന്നങ്ങളുമായി യുവാവിനെ പിടികൂടി
കൊയിലാണ്ടി : കൊയിലാണ്ടിയിൽ ഒന്നര ലക്ഷത്തോളം രൂപയുടെ പുകയില ഉൽപ്പന്നങ്ങളുമായി യുവാവിനെ പിടികൂടി. കൊല്ലം പിഷാരികാവ് ക്ഷേത്ര കവാടത്തിനടുത്തുവെച്ചാണ് 1500 പാക്കറ്റ് നിരോധിത പുകയില ഉൽപ്പന്നമായ ഹാൻസ്മായി കാസർഗോഡ് ഉപ്പള സ്വദേശിയായ അർഷാദ് (19) നെ കൊയിലാണ്ടി പോലീസ് പിടികൂടിയത്. സബ് ഇൻസ്‌പെക്ടർ കെ. കെ. രാജേഷ്കുമാർ പി. ഉണ്ണികൃഷ്ണൻ, എ.എസ്.ഐ. മാരായ ബാബു, സതീഷ് സി.പി.ഒ. മാരായ പുഷ്പരാജ്, ഒ. കെ, സുരേഷ്, ലഹരി വിരുദ്ധ സ്‌ക്വാഡ് അംഗങ്ങളായ കെ. സുനിൽ, അജേഷ് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. രഹസ്യ വിവരം ലഭിച്ചതിൻ്റെ അടിസ്ഥാനത്തിൽ നടത്തിയ പരിശോധനയിലാണ് ഇയാളെ വലയിലാക്കിയത്.
സ്കൂൾ, കോളേജ് വിദ്യാർത്ഥികൾക്കും ബീച്ച് ഏരിയയിലേ യുവാക്കൾക്കും ലഹരി വില്പന നടത്തുന്ന കണ്ണികളിലെ പ്രധാനിയാണ് ഇയാൾ. അടുത്ത കാലത്തായി കൊയിലാണ്ടി മേഖലയിൽ ലഹരി ഉപയോഗം കൂടിയത് ഏറെ ചർച്ചകൾക്ക് വഴിവെച്ചിരുന്നു. വരും ദിവസങ്ങളിൽ ശക്തമായ ലഹരിവേട്ട നടത്തുമെന്ന് എസ്.ഐ. രാജേഷ് കുമാർ പറഞ്ഞു. പിടിച്ചെടുത്ത ലഹരി ഉൽപ്പന്നത്തിന് വിപണിയിൽ ഒന്നര ലക്ഷം രൂപ വിലവരുമെന്ന് എസ്. ഐ. പറഞ്ഞു
