കൂടത്തായി കൊലപാതകം: സഖറിയാസിനെ വീണ്ടും ചോദ്യം ചെയ്യുന്നു
കോഴിക്കോട്: കൂടത്തായി കൊലപാതക പരമ്പരയുമായി ബന്ധപ്പെട്ട് ജോളിയുടെ രണ്ടാം ഭര്‍ത്താവ്‌ ഷാജുവിന്റെ പിതാവായ സഖറിയാസിനെ ചോദ്യം ചെയ്യുന്നു. ക്രൈം ബ്രാഞ്ച് സംഘം കൂടത്തായിയിലെ ഇവരുടെ വീട്ടിലെത്തിയാണ് ചോദ്യം ചെയ്യുന്നത്.
ഷാജുവിന്റെ ആദ്യ ഭാര്യ സിലിയുടെ കൊലപാതകവുമായി ബന്ധപ്പെട്ടാണ് ചോദ്യം ചെയ്യല്‍. നേരത്തെ സഖറിയാസിനെയും ഷാജുവിനെയും എസ്പി ഓഫീസിലേക്ക് വിളിച്ചുവരുത്തി അന്വേഷണ സംഘം ചോദ്യം ചെയ്തിരുന്നു. കൂടത്തായി കൊലപാതക പരമ്പരയില്‍ രണ്ടാമത് കൊല്ലപ്പെട്ട പൊന്നാമറ്റം ടോം തോമസിന്റെ സഹോദരനാണ്‌ സഖറിയാസ്.
പൊന്നാമറ്റത്തെ ബന്ധുവിന്റെ വിവാഹത്തില്‍ പങ്കെടുത്ത് മടങ്ങുമ്പോള്‍ ഷാജുവിനും ജോളിക്കും ഒപ്പം ആശുപത്രിയില്‍ എത്തിയ സിലി അവിടെ വെച്ചാണ് മരിക്കുന്നത്. ഷാജു ഡോക്ടറെ കാണാന്‍ അകത്തേക്ക് പോയപ്പോള്‍ സയനഡ് കലര്‍ത്തിയ പച്ചവെള്ളം നല്‍കിയാണ് സിലിയെ കൊന്നതെന്ന് ജോളി മൊഴി നല്‍കിയിരുന്നു. ഷാജുവിനെ സ്വന്തമാക്കാനായിരുന്നു ഈ കൊലപാതകമെന്നും ജോളി മൊഴിനല്‍കിയിരുന്നു.
