കുട്ടികള്‍ക്കെതിരായ ചൂഷണക്കേസുകളില്‍ കേരളാ പൊലീസിന് ഇന്റര്‍പോളിന്റെ സഹായവാഗ്ദാനം
തിരുവനന്തപുരം: കുട്ടികള്‍ക്കെതിരായ ലൈംഗിക ചൂഷണക്കേസുകളില്‍ കേരളാ പൊലീസിന് ഇന്റര്‍പോളിന്റെ സഹായവാഗ്ദാനം. പൊലീസും ഇന്റര്‍പോളും യോജിച്ച്‌ ഇന്ത്യയിലെ ആദ്യ സംയുക്ത അന്വേഷണ യൂണിറ്റ് കേരളത്തില്‍ തുടങ്ങാന്‍ തീരുമാനമായി. പൊലീസിലെ സൈബര്‍ വിദഗ്ധര്‍ക്ക് ഇന്റര്‍പോള്‍ പ്രത്യേക പരിശീലനം നല്‍കും.
കേസന്വേഷണത്തിനായി പ്രത്യേക ഓഫീസ് തുടങ്ങും. പരാതികള്‍ അറിയിക്കാന്‍ ടോള്‍ ഫ്രീ നമ്ബറും തുടങ്ങും. കുട്ടികള്‍ക്കെതിരായ ചൂഷണക്കേസുകളില്‍ അന്വേഷണത്തിന് സഹായകരമായ കൂടുതല്‍ വിവരങ്ങള്‍ ഇന്റര്‍പോള്‍ സൈബര്‍ഡോമിന് കൈമാറും. സൈബര്‍ വിദഗ്ധരുടെ സേവനവും ഉറപ്പാക്കും. ഇന്റര്‍പോളിലെ വിദഗ്ധരുടെ നേതൃത്വത്തില്‍ കേരള പൊലീസിന് പരീശീലനം നല്‍കാനും തീരുമാനമായി. ഓസ്ട്രേലിയയിലെ ക്യൂന്‍സ് ലാന്റ് പൊലീസ് സര്‍വീസിലെ സീനിയര്‍ ഡിറ്റക്ടീവ് ജോണ്‍ റോസും ഐസിഎംസി ലാ എന്‍ഫോഴ്സ്മെന്റിലെ ഗുല്ലിര്‍മോ ഗലാര്‍സയുമാണ് കേരളത്തിലെത്തിയത്.
ഡിജിപി ലോക്നാഥ് ബെഹ്റയും മറ്റ് ഉന്നത ഉദ്യോഗസ്ഥരുമായി ഇന്റര്‍പോള്‍ സംഘം കൂടിക്കാഴ്ച നടത്തി. രാജ്യത്ത് ആദ്യമായാണ് ഇന്റര്‍പോള്‍ ഇത്തരം അന്വേഷണങ്ങളില്‍ പൊലീസുമായി പ്രത്യേകം സഹകരിക്കുന്നത്. കേരള പൊലീസ് നടപ്പാക്കിയ ഓപ്പറേഷന്‍ പി ഹണ്ടിന്റെ വിജയത്തെ തുടര്‍ന്നാണ് ഇന്റര്‍പോള്‍ സംഘം കേരളത്തിലെത്തിയത്.
