കുട്ടനാടിന്റെ സമഗ്ര വികസനത്തിനായി പ്രത്യേക പദ്ധതി കൊണ്ടുവരും: മന്ത്രി വി. എസ്. സുനില്‍കുമാര്‍
ആലപ്പുഴ: പ്രളയക്കെടുതിയില്‍ നിന്നും ഇനിയും കരകയറാനാവാതെ ബുദ്ധിമുട്ടുന്ന കുട്ടനാടിന്റെ സമഗ്ര വികസനത്തിനായി കൃഷി വകുപ്പ് പ്രത്യേക പദ്ധതി കൊണ്ടുവരുമെന്ന് മന്ത്രി വി. എസ്. സുനില്‍കുമാര്‍. കുട്ടനാട്ടിലേക്ക് ഒഴുകിയെത്തുന്ന കിഴക്കന്‍ വെള്ളം വെള്ളപ്പൊക്കത്തിന് കാരണമാകാതെ കടലിലേക്ക് ഒഴുക്കുന്നതിന് പദ്ധതിയില്‍ പ്രാധാന്യം കൊടുക്കും.
ഒരാഴ്ചക്കകം കുട്ടനാട്ടിലെ വെള്ളപ്പൊക്കത്തിന് പരിഹാരം കാണുമെന്നും മന്ത്രി പറഞ്ഞു. തണ്ണീര്‍മുക്കത്തെയും തോട്ടപ്പള്ളിയിലെയും തടസങ്ങള്‍ നീക്കും. അനോരോഗ്യകരമായ രാഷ്ട്രീയ ഇടപെടല്‍ മൂലം സ്വാമിനാഥന്‍ കമ്മീഷന്‍ റിപ്പോര്‍ട്ട് വേണ്ട വിധത്തില്‍ നടപ്പായില്ലെന്നും മന്ത്രി പറഞ്ഞു.
കുട്ടനാട്ടിലെ കുടിവെള്ള ക്ഷാമം സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ട്. വെള്ളം എത്തിക്കാന്‍ പഞ്ചായത്തുകള്‍ക്ക് നിര്‍ദ്ദേശം നല്‍കിയെന്നും മന്ത്രി വ്യക്തമാക്കി. കൈനകരിയിലെ മട വീണ പാടശേഖരങ്ങളില്‍ മന്ത്രി വി.എസ്. സുനില്‍കുമാര്‍ സന്ദര്‍ശനം നടത്തി സ്ഥിതിഗതികള്‍ നേരിട്ട് വിലയിരുത്തി.
