കാണ്‍പൂരില്‍ ട്രെയിന്‍ പാളം തെറ്റി 13 പേര്‍ക്ക് പരിക്കേറ്റു
കാണ്‍പൂര്‍: യു പിയിലെ കാണ്‍പൂരില്‍ ട്രെയിന്‍ പാളം തെറ്റി 13 പേര്‍ക്ക് പരിക്കേറ്റു. കൊല്‍ക്കത്തയിലെ ഹൗറയില്‍ നിന്ന് ഡല്‍ഹിയിലേക്ക് പോവുകയായിരുന്ന ഹൗറ – ന്യൂഡല്‍ഹി പൂര്‍വ എക്സ്പ്രസിന്‍റെ 12 കോച്ചുകളാണ് പാളം തെറ്റിയത്. ഇതോടെ ഡല്‍ഹിയില്‍നിന്നുള്ള ട്രെയിനുകള്‍ വൈകും.
പുലര്‍ച്ചെ ഒന്നോടെ പ്രയാഗ്‍രാജ് സ്റ്റേഷന്‍ വിട്ട ശേഷമാണ് അപകടമുണ്ടായത്. ഇതുവഴിയുള്ള ട്രെയിന്‍ ഗതാഗതം നിര്‍ത്തിവെച്ചിരിക്കയാണ്‌. പന്ത്രണ്ട് കോച്ചുകളില്‍ അഞ്ചെണ്ണത്തിനെങ്കിലും കാര്യമായ കേടുപാടുകള്‍ പറ്റിയിട്ടുണ്ട്. എല്ലാ കോച്ചുകളും മറിഞ്ഞ നിലയിലാണ്. വൈകിട്ട് അഞ്ചോടെ മാത്രമേ റെയില്‍പ്പാതയിലൂടെ പൂര്‍ണ ഗതാഗതം സാധ്യമാകൂ എന്ന് ഉത്തരറെയില്‍വേ പിആര്‍ഒ അറിയിച്ചു.
