കാഞ്ഞങ്ങാട്ടു നിന്നും കാണാതായ വിദ്യാര്‍ഥിനിയെയും വിദ്യാര്‍ഥിയെയും ചെന്നൈയില്‍ നിന്നും കണ്ടെത്തി
കാസര്‍ഗോഡ്: കാഞ്ഞങ്ങാട്ടു നിന്നും ഒരുമാസം മുന്‍പ് കാണാതായ വിദ്യാര്‍ഥിനിയെയും വിദ്യാര്‍ഥിയെയും ചെന്നൈയില്‍ നിന്നും കണ്ടെത്തി. മാണിക്കോത്ത് മഡിയനിലെ പടിഞ്ഞാര്‍വളപ്പില്‍ പരേതനായ ഹസന്റെ മകള്‍ ഫാത്തിമത്ത് മുബ്ഷിറ (16), പുല്ലൂര്‍ സ്വദേശിയും സഹ വിദ്യാര്‍ഥിയുമായ നിയാസ് (17) എന്നിവരെയാണ് തമിഴ്നാട് പോലീസ് കണ്ടെത്തിയത്. തമിഴ്നാട് പോലീസ് ഇക്കാര്യം കേരള പോലീസിനെ അറിയിച്ചിട്ടുണ്ട്.
ഒരുമാസം മുന്‍പ് കാണാതായ ഇരുവരെയും കണ്ടെത്താന്‍ പോലീസ് അന്വേഷണം ഊര്‍ജിതമാക്കണമെന്ന് ആവശ്യപ്പെട്ട് നാട്ടുകാര്‍ ആക്ഷന്‍ കമ്മിറ്റി രൂപീകരിച്ചിരുന്നു. ചെന്നൈയില്‍ ഒരു മാസം മുന്‍പാണ് ഇരുവരും എത്തിയത്. ഇവരുടെ തിരോധാനം സംബന്ധിച്ച മാധ്യമവാര്‍ത്തകള്‍ കണ്ട ബേക്കറി തൊഴിലാളികലാണ് കുട്ടികളെ തിരിച്ചറിഞ്ഞത്. പിന്നീട് ഇയാള്‍ വിവരം പോലീസില്‍ അറിയിക്കുകയായിരുന്നു. കുട്ടികളുടെ ബന്ധുക്കള്‍ ചെന്നൈയിലേക്ക് പുറപ്പെട്ടിട്ടുണ്ട്.
