കടയടപ്പ് സമരം വിജയിപ്പിക്കും: വ്യാപാരി വ്യവസായി ഏകോപന സമിതി
കൊയിലാണ്ടി: നന്തി – ചെങ്ങോട്ടുകാവ് ബൈപ്പാസ് നിർമ്മാണം ആരംഭിക്കണമെന്നാവശ്യപ്പെട്ട് വ്യാപാരി കോ-ഓർഡിനേഷൻ കമ്മിറ്റി മാർച്ച് 1ന്‌ നടത്തുന്ന കടയടപ്പു സമരവും, സമര പ്രഖ്യാപന കൺവെൻഷനും വിജയിപ്പിക്കാൻ വ്യാപാരി വ്യവസായി ഏകോപന സമിതി ജനറൽ ബോഡി യോഗം തീരുമാനിച്ചു. കൊയിലാണ്ടിയിലെ ഗതാഗതക്കുരുക്കിന്‌ പരിഹരിക്കാൻ നന്തി- ചെങ്ങോട്ടുകാവ് ബൈപ്പാസ് മാത്രമാണ് പരിഹാരം. ഭൂമിയും, വീടും, നഷ്ടപ്പെടുന്ന വർക്ക് മതിയായ നഷ്ട പരിഹാര പാക്കേജ് പ്രഖ്യാപിക്കണമെന്ന് യോഗം ആവശ്യപ്പെട്ടു.
കൊയിലാണ്ടി മേൽപ്പാലത്തിനു വേണ്ടി കടകൾ നഷ്ടപ്പെട്ട വ്യാപാരികൾക്ക് പുനരധിവാസം നൽകുന്നതിൽ നഗരസഭ കാണിക്കുന്ന അനാസ്ഥക്കെതിരെ പ്രക്ഷോഭത്തിനിറങ്ങാനും യോഗം തീരുമാനിച്ചു. ബപ്പൻകാട് റെയിൽവെ അടിപ്പാത ഉടൻ പ്രവർത്തി ആരംഭിക്കണമെന്നും യോഗം ആവശ്യപ്പെട്ടു. യോഗത്തിൽ 18 ഓളം വ്യാപാരികൾക്ക് പെൻഷൻ ചെക്ക് വിതരണം ചെയ്തു. യോഗത്തിൽ കെ.പി.ശ്രീധരൻ അദ്ധ്യക്ഷത വഹിച്ചു. സി.കെ.സുനിൽ പ്രകാശ്, സി.എം.കൃഷ്ണൻ, കെ.വി.നസീർ, കെ.കെ.ഫാറൂഖ്, സി.കെ. ബാലകൃഷ്ണൻ, പ്രേംനാഥ്, വിജയൻ, ഗീത ഗോപാലകൃഷ്ണൻ എന്നിവർ സംസാരിച്ചു.
