എഞ്ചിനീയറിംങ് പ്രവേശന പരീക്ഷയില്‍ നാലും എട്ടും റാങ്കുകള്‍ നേടി ഇരട്ട സഹോദരന്‍മാര്‍
കാസര്‍ഗോഡ്: സംസ്ഥാന എഞ്ചിനീയറിംങ് പ്രവേശന പരീക്ഷയില്‍ നാലും എട്ടും റാങ്കുകള്‍ നേടി ഇരട്ട സഹോദരന്‍മാര്‍. കാഞ്ഞങ്ങാട് മാവുങ്കാല്‍ സ്വദേശികളായ സഞ്ജയും സൗരവുമാണ് മിന്നും വിജയം നേടിയത്.
മാവുങ്കാല്‍ കാട്ടുകുളങ്കര സൗപര്‍ണികയില്‍ ഇത്തവണ ഇരട്ട റാങ്കിന്‍റെ തിളക്കം. എഞ്ചിനീയറിംഗ് എന്‍ട്രന്‍സ് പരീക്ഷയുടെ ഉത്തര സൂചിക വന്നതോടെ തന്നെ ആദ്യ പത്ത് സ്ഥാനക്കാരില്‍ ഉണ്ടാകുമെന്ന് ഇരുവരും പ്രതീക്ഷിച്ചിരുന്നു. 960 മാര്‍ക്കില്‍ 870 മാര്‍ക്ക് നേടിയ സഞ്ജയ്ക്കാണ് നാലാം റാങ്ക്. 35 മാര്‍ക്കിന്‍റെ വ്യത്യാസത്തില്‍ സൗരവിന് എട്ടാം റാങ്ക്.
സംസ്ഥാന പ്രവേശന പരീക്ഷയില്‍ മിന്നും റാങ്ക് നേടിയെങ്കിലും ദേശീയ പ്രവേശന പരീക്ഷയിലാണ് ഇരുവരുടേയും ശ്രദ്ധ. ജെഇഇ അഡ്വാന്‍സ്ഡ് പരീക്ഷയും കടന്ന് ഐഐടിയാണ് ലക്ഷ്യം.
കാഞ്ഞങ്ങാട്ടെ വ്യാപാരി സി സുകുമാരന്‍ സിവില്‍ പൊലീസ് ഓഫീസര്‍ സി സുജാതയുടേയും മക്കളാണ് ഈ മിടുക്കര്‍. സഹോദരി സനേഹ തമിഴ്നാട് കേന്ദ്ര സര്‍വ്വകലാശാലയില്‍ വിദ്യാര്‍ത്ഥിനിയാണ്
