എം.ജി.കെ മേനോന്‍ അന്തരിച്ചു
ഡല്‍ഹി: മുന്‍ കേന്ദ്രമന്ത്രിയും പ്രമുഖ പ്രപഞ്ച ശാസ്ത്രജ്ഞനുമായിരുന്ന എം.ജി.കെ മേനോന്‍ അന്തരിച്ചു. 88 വയസായിരുന്നു. ഭാര്യയും മകനും മകളുമുണ്ട്.
വി.പി.സിംഗ് മന്ത്രിസഭയില്‍ ശാസ്ത്ര സാങ്കേതിക,വിദ്യാഭ്യാസ സഹമന്ത്രിയായി സേവനമനുഷ്‍ഠിച്ചിട്ടുണ്ട്. ശാസ്ത്ര സാങ്കേതിക വകുപ്പ് സെക്രട്ടറിയായും പ്രവര്‍ത്തിച്ചു. 1972ല്‍ ഐ.എസ്.ആര്‍.ഒ ചെയര്‍മാനായിരുന്ന മേനോന്‍ 35ആം വയസില്‍ ടാറ്റ ഇന്‍സ്റ്റിറ്റ്യൂട്ട് ഒഫ് ഫണ്ടമെന്റല്‍ റിസര്‍ച്ചിന്റെ ഡയറക്ടറായും ജോലി നോക്കി. പദ്മവിഭൂഷണ്‍ ജേതാവ് കൂടിയായ മേനോന്‍, കോസ്മിക് കിരണങ്ങളെ കുറിച്ച്‌ നടത്തിയ പഠനങ്ങള്‍ ഏറെ ശ്രദ്ധിക്കപ്പെട്ടിരുന്നു.
1982- 89 കാലത്ത് ആസൂത്രണ കമ്മിഷന്‍ അംഗമായിരുന്നു. 1986-89ല്‍ പ്രധാനമന്ത്രിയുടെ ശാസ്ത്ര ഉപദേഷ്ടാവായും സി.എസ്.ഐ.ആര്‍ വൈസ് പ്രസിഡന്റായും പ്രവര്‍ത്തിച്ചു. 1990-96ല്‍ രാജ്യസഭാംഗമായിരുന്നു. റോയല്‍ സൊസൈറ്റി ഒഫ് ലണ്ടന്‍, ഇന്ത്യന്‍ അക്കാഡമി ഒഫ് സയന്‍സസ് എന്നിവിടങ്ങളില്‍ ഫെലോയായും പ്രവര്‍ത്തിച്ചു.
