അഡ്വ. പി സതീദേവിക്കെതിരെ കൊലവിളി നടത്തിയ ബി.ജെ.പി. നേതാവിനെതിരെ കേസെടുക്കണമെന്ന് ടി.എന്‍.സീമ
ജനാധിപത്യ മഹിളാ അസോസിയേഷന്‍ സംസ്ഥാന സെക്രട്ടറി അഡ്വ. പി സതീദേവിക്കെതിരെ കൊലവിളി നടത്തിയ ബി.ജെ.പി നേതാവിന്റെ പേരില്‍ കേസെടുത്ത് നിയമ നടപടികള്‍ സ്വീകരിക്കണമെന്ന് സി.പി.എം നേതാവ് ടി.എന്‍.സീമ ആവശ്യപ്പെട്ടു. അഡ്വ. പി സതീദേവിയെ കൊത്തിനുറുക്കുമെന്ന ബിജെപി നേതാവ് ഗോപാലകൃഷ്ണന്റെ കൊലവിളി ക്രിമിനല്‍ കുറ്റമാണെന്ന് അവര്‍ ആരോപിച്ചു. സുപ്രീം കോടതിയുടെ വിധിയുടെ അടിസ്ഥാനത്തില്‍ സ്ത്രീകളുടെ അവകാശങ്ങളെ കുറിച്ച്‌ സംസാരിക്കുന്നവരെയെല്ലാം വെട്ടിനുറുക്കുമെന്നുള്ളതാണ് ബിജെപി യുടെ നിലപാടെന്നും, ഇത് എല്ലാ ജനാധിപത്യ മര്യാദകളെയും ലംഘിക്കുന്നതിന് സമമാണെന്നും ടി.എന്‍.സീമ ഫേസ്ബുക്ക് പോസ്റ്റില്‍ ആരോപിക്കുന്നു.
ഫേസ്ബുക്ക് പോസ്റ്റിന്റെ പൂര്‍ണരൂപം .
ജനാതിപത്യ മഹിളാ അസോസിയേഷന്‍ സംസ്ഥാന സെക്രട്ടറി അഡ്വ. പി സതീദേവിയെ കൊത്തിനുറുക്കുമെന്ന ബിജെപി നേതാവ് ഗോപാലകൃഷ്ണന്റെ കൊലവിളി ഏറ്റവും കടുത്ത ക്രിമിനല്‍ കുറ്റമാണ്. അയാള്‍ക്കെതിരെ കേസെടുത്തു നിയമനടപടി സ്വീകരിക്കണം. സുപ്രീം കോടതിയുടെ വിധിയുടെ അടിസ്ഥാനത്തില്‍ സ്ത്രീകളുടെ അവകാശങ്ങളെ കുറിച്ച്‌ സംസാരിക്കുന്നവരെയെല്ലാം വെട്ടിനുറുക്കുമെന്നുള്ള ബിജെപി യുടെ നിലപാട് എല്ലാ ജനാതിപത്യ മര്യാദകളും ലംഘിക്കുന്നതാണ്. മഹിളാ മോര്‍ച്ച നേതാക്കള്‍ ഇതിനു മറുപടി പറയണം.
ഇങ്ങനെയാണോ അവകാശങ്ങള്‍ക്ക് വേണ്ടി പോരാടുന്ന സ്ത്രീകളോടുള്ള സമീപനം. സതീദേവിക്കതിരെയുള്ള കൊലവിളി അവകാശങ്ങള്‍ക്ക് വേണ്ടി പോരാടുന്ന ഇന്ത്യയിലെ ഓരോ സ്ത്രീക്ക് നേരെയും ഉയര്‍ത്തിയ കൊലവിളിയാണ്. ഇതിനെ സ്ത്രീകള്‍ നേരിടുകതന്നെ ചെയ്യും.
