അഖിലേന്ത്യാ സെവന്‍സ് ഫുട്ബോള്‍ മത്സരം നാളെ
മാവൂര്‍: ജവഹര്‍ മാവൂര്‍ സംഘടിപ്പിക്കുന്ന അഖിലേന്ത്യാ സെവന്‍സ് ഫുട്ബോള്‍ മത്സരം ഞായറാഴ്ച തുടങ്ങും. മാവൂര്‍-കോഴിക്കോട് റോഡിനോട് ചേര്‍ന്നുള്ള കല്‍പ്പള്ളി ഫ്ളഡ്ലിറ്റ് സ്റ്റേഡിയത്തില്‍ വൈകീട്ട് ഏഴരയ്ക്കാണ് ഉദ്ഘാടന മത്സരം.
ഘാന, ഐവറികോസ്റ്റ്, നൈജീരിയ, സുഡാന്‍, കാമറൂണ്‍, നേപ്പാള്‍ തുടങ്ങിയ രാജ്യങ്ങളില്‍നിന്നുള്ള താരങ്ങളും ഐ.എസ്.എല്‍. താരങ്ങളും വിവിധ ടീമുകള്‍ക്കുവേണ്ടി ബൂട്ടണിയും. 6000 പേര്‍ക്ക് ഇരുന്ന് കളികാണാനുള്ള ഗാലറി നിര്‍മാണം പൂര്‍ത്തിയാക്കി. കാണികളെയും കളിക്കാരെയും എസ്.എഫ്.എ. അഞ്ചുകോടി രൂപയുടെ ഇന്‍ഷുര്‍ പരിധിയില്‍ ഉള്‍പ്പെടുത്തിയിട്ടുണ്ട്. ഉദ്ഘാടന മത്സരത്തില്‍ അല്‍ശബാക്ക് തൃപ്പനച്ചിയും സോക്കര്‍ സ്പോര്‍ട്സിങ് തൃശ്ശൂരും തമ്മില്‍ മാറ്റുരയ്ക്കും.
ഫിഫാ മഞ്ചേരി, ടൗണ്‍ ടീം അരീക്കോട്, എഫ്.സി. കുണ്ടോട്ടി, മെഡി ഗാര്‍ഡ് അരീക്കോട്, ബ്ലാക്ക് ആന്‍ഡ് വൈറ്റ് കോഴിക്കോട്, ആതിഥേയരായ ജവഹര്‍ മാവൂര്‍ തുടങ്ങിയ 24 ടീമുകളാണ് ടൂര്‍ണമെന്റില്‍ മത്സരിക്കുന്നത്. സെവന്‍സ് ഫുട്ബാള്‍ ടൂര്‍ണമെന്റില്‍നിന്ന് ലഭിക്കുന്ന ലാഭം ജീവകാരുണ്യപ്രവര്‍ത്തനങ്ങള്‍ക്കും ജവഹറിന്റെ ഡേ ബോര്‍ഡിങ് ഫുട്ബാള്‍ കോച്ചിങ് സെന്ററിന്റെ പ്രവര്‍ത്തനങ്ങള്‍ക്കുമാണ് ചെലവഴിക്കുന്നതെന്ന് ടൂര്‍ണമെന്റ് കമ്മിറ്റി ചെയര്‍മാന്‍ ജവഹര്‍ അഹമ്മദ്കുട്ടി, കണ്‍വീനര്‍ അഡ്വ. ഷമീം പക്സാന്‍ എന്നിവര്‍ പറഞ്ഞു. ടൂര്‍ണമെന്റിലെ വിജയികള്‍ക്ക് ജവഹര്‍ ക്ലബിന്റെ മുന്‍കാല കളിക്കാരനായിരുന്ന മൂലക്കടവത്ത് മുഹമ്മദാലി സ്മാരക ട്രോഫിയും റണ്ണറപ്പ് വിജയികള്‍ക്ക് പരരാമന്‍ മെമ്മോറിയല്‍ ട്രോഫിയുമാണ് സമ്മാനിക്കുക.
