സാലറി ചലഞ്ചിന് ജീവനക്കാരെ നിര്‍ബന്ധിക്കരുതെന്ന്‌ ഹൈക്കോടതി
കൊച്ചി: മുഖ്യമന്ത്രിയുടെ സാലറി ചലഞ്ചിന് ജീവനക്കാരെ നിര്‍ബന്ധിക്കരുതെന്ന്‌ ഹൈക്കോടതി. സാലറി ചലഞ്ച്‌ സംബന്ധിച്ച ചീഫ് സെക്രട്ടറിയുടെ ഉത്തരവ്‌ ലംഘിക്കുന്നില്ലെന്ന്‌ ഉറപ്പുവരുത്തണമെന്നും കോടതി പറഞ്ഞു. ദുരിതാശ്വാസത്തിന് ശമ്ബളം സംഭാവന ചെയ്യുന്നത് സ്വമേധയാ ആകണമെന്ന് ചീഫ് സെക്രിട്ടറിയുടെ ഉത്തരവുണ്ടായിരുന്നു. ഇതിനു വിരുദ്ധമായി നിര്‍ബന്ധിത പിരിവ് ശരിയല്ല. സര്‍ക്കാര്‍ ഉദ്യോഗസ്ഥരിലും ദുരിതബാധിതരുണ്ട്. അവരുടെ പട്ടിക തയ്യാറാക്കിയിട്ടുണ്ടോ എന്നും കോടതി ചോദിച്ചു.
സാലറി ചലഞ്ചിന് തയ്യാറാകാത്തവരോട്‌ വിസമ്മതപത്രം എന്തിനാണ്‌ ആവശ്യപ്പെടുന്നതെന്നും സാലറി ചലഞ്ചിനെതിരെയുള്ള കേസ് പരിഗണിക്കവേ കോടതി ചോദിച്ചു. സാലറി ചലഞ്ചില്‍ പങ്കെടുക്കാത്തവരുടെ പട്ടിക തയ്യാറാക്കിയ വകുപ്പ് ഉദ്യോഗസ്ഥര്‍ക്കെതിരെ എന്തെങ്കിലും നടപടി സ്വീകരിച്ചിട്ടുണ്ടോ എന്നും കോടതി ചോദിച്ചു. ഇത് സംബന്ധിച്ച്‌ വിശദീകരണം നല്‍കാനും സര്‍ക്കാരിനോട് കോടതി നിര്‍ദ്ദേശിച്ചു. കേസ് അടുത്ത ചൊവ്വാഴ്ചത്തേക്ക് മാറ്റിവച്ചു.
