ഷോളയൂരിലെ സ്വകാര്യ പോളിടെക്നിക്കിലെ ഒന്നാം വര്‍ഷ വിദ്യാര്‍ഥി കുത്തേറ്റ നിലയില്‍
പാലക്കാട് : അട്ടപ്പാടി ഷോളയൂരിലെ സ്വകാര്യ പോളിടെക്നിക്കിലെ ഒന്നാം വര്‍ഷ വിദ്യാര്‍ഥി കുത്തേറ്റ നിലയില്‍ ആശുപത്രിയില്‍ പ്രവേശിപ്പിച്ചു. അരീക്കോട് മുക്കം സ്വദേശി ജിതില്‍ ജോയ് ആണ് ആശുപത്രിയില്‍ ചികിത്സയിലുള്ളത്. വിദ്യാര്‍ഥിയുടെ ദേഹത്ത് കുപ്പി പോലുള്ള മൂര്‍ച്ചയേറിയ ആയുധം കൊണ്ടു മുറിവേല്‍പ്പിച്ചതിനെ തുടര്‍ന്ന് ഇരുപതോളം തുന്നലുകളിട്ടുവെന്ന് ആശുപത്രി അധികൃതര്‍ പറഞ്ഞു.
പുലര്‍ച്ചെ ശുചിമുറിയിലേയ്ക്ക് പോയ ജിതിലിനെ പതിയിരുന്ന അജ്ഞാതസംഘം പൊട്ടിയ കുപ്പികൊണ്ട് കഴുത്തിലും നെഞ്ചത്തും മുറിവേല്‍പ്പിക്കുകയായിരുന്നു. കോണിപ്പടിയില്‍ വച്ച്‌ ചവിട്ടി കാലൊടിച്ചെന്നും ജിതിലിന്റെ സുഹൃത്തുകള്‍ പറഞ്ഞു. ബഹളം കേട്ട് എത്തിയ സുഹൃത്തുകളാണ് ജിതിലിനെ ആശുപത്രിയില്‍ എത്തിച്ചത്.
