വെള്ളപ്പൊക്കത്തില്‍ ഒഴുകിയെത്തിയ കാട്ടാനയെ നാട്ടുകാര്‍ രക്ഷപ്പെടുത്തി
തൃശൂര്‍: ചാലക്കുടി പുഴയിലുണ്ടായ വെള്ളപ്പൊക്കത്തില്‍ ഒഴുകിയെത്തിയ കാട്ടാനയെ നാട്ടുകാര്‍ രക്ഷപ്പെടുത്തി. തിങ്കളാഴ്ച രാവിലെ അതിരപ്പിള്ളിക്കടുത്ത് ചാര്‍പ്പ വെള്ളച്ചാട്ടത്തിന് സമീപമാണ് കാട്ടാന കുടുങ്ങിയത്. രാവിലെ പുഴയില്‍ ആനയെ കണ്ടതിനെ തുടര്‍ന്ന് നാട്ടുകാരാണ് വനംവകുപ്പിനെ വിവരം അറിയിച്ചത്. തുടര്‍ന്ന് ഏറെ നേരത്തെ പരിശ്രമത്തിന് ശേഷം വനംവകുപ്പും നാട്ടുകാരും ചേര്‍ന്ന് ആനയെ കരയില്‍ കയറ്റി വിടുകയായിരുന്നു.
പെരിങ്ങല്‍ക്കുത്ത് അണക്കെട്ടിലെ മൂന്ന് ഷട്ടറുകളും താഴ്‌ത്തി വെള്ളം നിയന്ത്രിച്ചാണ് ആനയെ കരയില്‍ കയറ്റിയത്. ഏറെ മണിക്കൂറുകള്‍ കാട്ടാന വെള്ളത്തിന് നടുവില്‍ കഴിഞ്ഞതായാണ് വിവരം.
