പൊലീസ് കസ്റ്റഡിയിലെടുത്ത് വിട്ടയച്ച യുവാവ് തൂങ്ങിമരിച്ച നിലയില്‍
തിരുവനന്തപുരം: പൊലീസ് കസ്റ്റഡിയിലെടുത്ത് വിട്ടയച്ച യുവാവ് തൂങ്ങിമരിച്ച നിലയില്‍. തൊടുപുഴ കുളങ്ങാട്ടുപാറ സ്വദേശി രതീഷിനെയാണ് മരിച്ച നിലയില്‍ കണ്ടെത്തിയത്. കഴിഞ്ഞ ദിവസം കസ്റ്റഡിയിലെടുത്ത ഇയാളെ തൊടുപുഴ സി.ഐയുടെ നേതൃത്വത്തില്‍ മര്‍ദ്ദിച്ചിരുന്നുവെന്ന് സഹോദരിയും ബന്ധുക്കളും ആരോപിച്ചു.
മൃതദേഹം മാറ്റാനെത്തിയ പൊലീസ് സംഘത്തിനെ നാട്ടുകാര്‍ തടഞ്ഞുവച്ചു. ആര്‍.ഡി.ഒ എത്താതെ മൃതദേഹം മാറ്റില്ലെന്ന നിലപാടിലാണ് ബന്ധുക്കള്‍. ഇന്നലെ വൈകിട്ട് ഒരു യുവതിയോടൊപ്പം കണ്ടതിനാണ് യുവാവിനെ കസ്റ്റഡിയിലെടുത്തതെന്നാണ് വിവരം.
എന്നാല്‍ സ്റ്റേഷനില്‍ നിന്ന് വിട്ടയച്ച ഇയാള്‍ വീട്ടിലെത്തിയ ശേഷം തൂങ്ങിമരിക്കുകയായിരുന്നു എന്നാണ് ബന്ധുക്കള്‍ പറയുന്നത്. രതീഷിന്റെ പുറത്ത് മര്‍ദ്ദിച്ചതിന്റെ നിരവധി പാടുകളുണ്ടായിരുന്നുവെന്നും സംഭവത്തിന് ശേഷം ഇയാള്‍ മുറി വിട്ട് പുറത്തിറങ്ങിയില്ലെന്നും സഹോദരിയും അമ്മയും പറഞ്ഞു.
എന്നാല്‍ രതീഷിനെ കസ്റ്റഡിയിലെടുത്തിരുന്നെങ്കിലും മര്‍ദ്ദിച്ചിരുന്നില്ലെന്ന് തൊടുപുഴ സി.ഐ എന്‍.ജി.ശ്രീമോന്‍ പറഞ്ഞു. ഇയാളെ ഉപദേശിച്ച്‌ വിട്ടയയ്ക്കുകയായിരുന്നു എന്നും അദ്ദേഹം പ്രതികരിച്ചു.
