ദീപാവലി ദിനത്തില്‍ പടക്കങ്ങള്‍ പൊട്ടിക്കുന്നതിനുള്ള സമയം ക്രമം തമിഴ്നാട് സര്‍ക്കാര്‍ പ്രഖ്യാപിച്ചു
ചെന്നൈ: സുപ്രീംകോടതി വിധിയുടെ പശ്ചാത്തലത്തില്‍ ദീപാവലി ദിനത്തില്‍ പടക്കങ്ങള്‍ പൊട്ടിക്കുന്നതിനുള്ള സമയം ക്രമം തമിഴ്നാട് സര്‍ക്കാര്‍ പ്രഖ്യാപിച്ചു. രാവിലെ ആറ് മുതല്‍ ഏഴ് വരെയും രാത്രി ഏഴ് മുതല്‍ എട്ട് വരെയുമാണ് പടക്കങ്ങള്‍ പൊട്ടിക്കാന്‍ അനുവദിച്ചിരിക്കുന്നത്. സംസ്ഥാനത്തെ മലിനീകരണ നിയന്ത്രണ ബോര്‍ഡ് ഏഴ് ദിവസം സ്ഥിതിഗതികള്‍ നിരീക്ഷിക്കും.
ദീപാവലി ദിവസം ദക്ഷിണേന്ത്യന്‍ സംസ്ഥാനങ്ങളില്‍ പകല്‍ സമയത്ത് സൗകര്യപ്രദമായ രണ്ടു മണിക്കൂര്‍ നേരം പടക്കങ്ങള്‍ പൊട്ടിക്കാമെന്നു സുപ്രീംകോടതി കഴിഞ്ഞ ദിവസം ഉത്തരവിട്ടിരുന്നു.ദീപാവലിക്ക് രാത്രി എട്ടു മുതല്‍ പത്തു വരെ മാത്രമെ പടക്കങ്ങള്‍ പൊട്ടിക്കാവൂയെന്ന വിധിയില്‍ ഇളവു വരുത്തിയാണ് സുപ്രീംകോടതിയുടെ പുതിയ വിധി.
ദീപാവലി ദിവസം രാവിലെ പടക്കം പൊട്ടിക്കുന്ന ആചാരം നിലനില്‍ക്കുന്നതിനാല്‍ രാവിലെ നാലര മുതല്‍ ആറര വരെ ഇതിനനുവാദം നല്‍കണമെന്നു ആവശ്യപ്പെട്ടുകൊണ്ടു തമിഴ്നാട് സര്‍ക്കാരാണ് ബുധനാഴ്‍ച സുപ്രീംകോടതിയെ സമീപിച്ചത്.
ഇതിന്റെ അടിസ്ഥാനത്തിലാണ് എല്ലാ ദക്ഷിണേന്ത്യന്‍ സംസ്ഥാനങ്ങള്ക്കും പകല്‍ രണ്ടു മണിക്കൂര്‍ പടക്കം പൊട്ടിക്കുന്നതിനു സുപ്രീംകോടതി അനുവാദം നല്കിയത്. നവംബര് ആറിനാണ് തമിഴ്നാട്ടില് ദീപാവലി ആഘോഷം.
