കോഴിക്കടകളില്‍ നീണ്ട ക്യൂ ; വില 100 രൂപയിലേക്ക്
കോട്ടയം: പക്ഷിപ്പനിയും കോവിഡ് 19 ഭീതിയും മൂലം വില കൂപ്പുക്കുത്തിയ ഇറച്ചിക്കോഴി വിപണി വീണ്ടും സജീവമായി. ശനിയാഴ്ച മുതല്‍ കോഴിക്കടകളില്‍ വന്‍ തിരക്കാണ് അനുഭവപ്പെടുന്നത്. ഇതോടെ വില 90 മുതല്‍ രൂപയിലേക്ക് കയറി. അതിനിടെ കോഴി മുട്ടയ്ക്ക് 1.50 രൂപ വരെയായി കുറഞ്ഞു
കോവിഡ് ഭീതിയോ സര്‍ക്കാരിന്‍റെ മാര്‍ഗനിര്‍ദ്ദേശങ്ങളോ ഒന്നും കോഴിക്കടകളില്‍ ബാധകമല്ല. ഞായറാഴ്ചത്തെ ജനതാ കര്‍ഫ്യൂവിന് മുന്നോടിയായി നാട്ടിന്‍പുറങ്ങളിലെ ഇറച്ചിക്കടകളില്‍ എല്ലാം ശനിയാഴ്ച വന്‍ തിരക്കായിരുന്നു. കോഴിയിറച്ചി പലയിടത്തും കിട്ടാത്ത സാഹചര്യം വരെയുണ്ടായി. ഇതോടെയാണ് ശനിയാഴ്ച 65 രൂപ വിലയുണ്ടായിരുന്ന കോഴിക്ക് ഇന്ന് നൂറിലേക്ക് എത്തിയത്.
ലോക്ക്ഡൗണ്‍ ഉണ്ടായേക്കും എന്ന് കരുതപ്പെടുന്ന ജില്ലകളിലാണ് ഇറച്ചിക്കടകളില്‍ വന്‍ തിരക്ക് അനുഭവപ്പെടുന്നത്. ഇത് നിയന്ത്രിക്കാന്‍ ഒരു സംവിധാനവും അധികൃതര്‍ ചെയ്തിട്ടില്ല. കടകളില്‍ കൂട്ടമായി എത്തുന്ന ആളുകള്‍ക്ക് നിയന്ത്രണം ഏര്‍പ്പെടുത്തണമെന്ന ആവശ്യം ശക്തമാണ്.
