വടകരയില്‍ എല്‍ഡിഎഫിന് തെരഞ്ഞെടുപ്പ് ഊര്‍ജ്ജം പകര്‍ന്ന് രക്തസാക്ഷി കുടുംബ സംഗമം
വടകര: വടകരയില്‍ എല്‍ഡിഎഫിന് തെരഞ്ഞെടുപ്പ് ഊര്‍ജ്ജം പകര്‍ന്ന് രക്തസാക്ഷി കുടുംബ സംഗമം. സി പി ഐ (എം) സംസ്ഥാന സെക്രട്ടറി കോടിയേരി ബാലകൃഷ്ണന്‍ സംഗമം ഉദ്ഘാടനം ചെയ്തു. 93 രക്തസാക്ഷി കുടുംബങ്ങള്‍ പങ്കെടുത്ത ചടങ്ങ്, എല്‍ ഡി എഫിനെതിരായ പ്രചാര വേലക്കുള്ള മറുപടിയാണെന്ന് കോടിയേരി പറഞ്ഞു.
ഏറെ വൈകാരികതമുറ്റി നിന്ന ചടങ്ങായി വടകര കോട്ടപ്പറമ്പ് നടന്ന രക്തസാക്ഷി കുടുംബ സംഗമം. വടകര പാര്‍ലമെന്റ് മണ്ഡലത്തിലെ 93 സി പി ഐ എം രക്തസാക്ഷി കുടുംബങ്ങള്‍ ആദരം ഏറ്റുവാങ്ങി. ഒഞ്ചിയം രക്തസാക്ഷികളുടെ ബന്ധുക്കളും കൂത്തുപറമ്പില്‍ വെടിയേറ്റ് മരിച്ച ധീര രക്തസാക്ഷികളുടെ കുടുംബാംഗങ്ങളും ചടങ്ങിനെത്തി.
കമ്മ്യൂണിസ്റ്റുകാരായ എല്ലാ മത വിഭാഗത്തില്‍ പെട്ടവരേയും എതിരാളികള്‍ കൊലപ്പെടുത്തിയിട്ടുണ്ടെന്ന് സംഗമം ഉദ്ഘാടനം ചെയ്ത കോടിയേരി പറഞ്ഞു. എന്നിട്ടും ഇടതുപക്ഷക്കാരെ, അക്രമികള്‍ എന്ന് പ്രചരിപ്പിക്കുകയാണ്.
കോണ്‍ഗ്രസ് നേതാവായിരുന്ന കെ കരുണാകരന്‍ കൊല കേസില്‍ പ്രതിയായിരുന്ന കാര്യവും കോടിയേരി ഓര്‍മ്മിപ്പിച്ചു.
എല്‍ഡി എഫ് സ്ഥാനാര്‍ത്ഥി പി ജയരാജനെ വ്യക്തിപരമായി തേജോവധം ചെയ്യുന്ന പ്രവര്‍ത്തനം വടകരയില്‍ നടക്കുന്നു. വടകരയില്‍ ആര്‍ എസ് എസും യു ഡി എഫും ഒരേ തൂവല്‍ പക്ഷികളെ പോലെ പ്രവര്‍ത്തിക്കുന്നതെന്നും കോടിയേരി അഭിപ്രായപ്പെട്ടു. കോണ്‍ഗ്രസുകാരാല്‍ കൊല ചെയ്യപ്പെട്ട മൊയ്യാരത്ത് ശങ്കരന്റെ മകന്‍, കെ. വി സുധീഷിന്റെ കുടുംബാംഗങ്ങള്‍ തുടങ്ങിയവരും ആദരം ഏറ്റുവാങ്ങി. മന്ത്രി ടി പി രാമകൃഷ്ണന്‍, വടകരയിലെ എല്‍. ഡി. എഫ് സ്ഥാനാര്‍ത്ഥി പി ജയരാജന്‍, എല്‍ ഡി എഫ് നേതാക്കള്‍ എന്നിവര്‍ ചടങ്ങില്‍ സംബന്ധിച്ചു.
