ബിജെപി ദേശീയ കൗണ്‍സില്‍ യോഗം ഇന്നും നാളെയും ദില്ലിയില്‍ ചേരും
ദില്ലി: ലോക്സഭ തെരഞ്ഞെടുപ്പ് ഒരുക്കങ്ങള്‍ ചര്‍ച്ച ചെയ്യാന്‍ ബിജെപി ദേശീയ കൗണ്‍സില്‍ യോഗം ഇന്നും നാളെയും ദില്ലിയില്‍ ചേരും. പ്രധാനമന്ത്രി നരേന്ദ്രമോദി ഉള്‍പ്പടെയുള്ള മുന്‍നിര നേതാക്കള്‍ പങ്കെടുക്കും. നിയമസഭാതെരഞ്ഞെടുപ്പിലെ തിരിച്ചടിയുടെ പശ്ചാത്തലത്തില്‍ കൂടുതല്‍ ജാഗ്രതയോടെ മുന്നോട്ടുപോകാനുള്ള തീരുമാനങ്ങള്‍ ദേശീയ കൗണ്‍സിലില്‍ ഉണ്ടാകും.
ലോകസ്ഭാ തെരഞ്ഞെടുപ്പിന് മാസങ്ങള്‍ മാത്രമാണ് ഉള്ളത്. എല്ലാ സംസ്ഥാനത്തു നിന്നുമായി പന്ത്രണ്ടായിരത്തോളം പ്രതിനിധികള്‍ യോഗത്തില്‍ പങ്കെടുക്കുന്നുണ്ട്. അമിത്ഷാ അടക്കമുള്ള മുന്‍ നിര നേതാക്കള്‍ യോഗത്തില്‍ പങ്കെടുക്കും. മധ്യപ്രദേശത്തിലും രാജസ്ഥാനിലും ഛത്തീസ്ഗഢിലും നേരിട്ട തെരഞ്ഞെടുപ്പ് പരാജയം ദേശീയ കൗണ്‍സിലില്‍ ചര്‍ച്ചയാകും.
കൂടുതല്‍ ശ്രദ്ധയോടെ മുന്നോട്ട് പോയില്ലെങ്കില്‍ തിരിച്ചടിയുണ്ടാകുമെന്നാണ് ബിജെപി നേതൃത്വത്തിന്‍റെ വിലയിരുത്തില്‍. കഴിഞ്ഞ തവണ ലോക്സഭാ തെര‍ഞ്ഞെടുപ്പില്‍ ലഭിച്ച അനായാസ വിജയം ഇത്തവണ ഉണ്ടാകുമോ എന്ന ആശങ്ക നേതൃത്വത്തിനുണ്ട്. കഴിഞ്ഞ തവണ ഏറ്റവും കൂടുതല്‍ സീറ്റ് നേടിയ ഉത്തര്‍പ്രദേശ് പോലുള്ള സംസ്ഥാനങ്ങളിലെ നിലവിലെ രാഷ്ട്രീയ അന്തരീക്ഷം അടക്കം ചര്‍ച്ചയാവും. പ്രധാനമന്ത്രി നരേന്ദ്രമന്ത്രിയുടെ പ്രസംഗത്തോടെ യോഗം നാളെസമാപിക്കും.
