എംഎല്എ ഹോസ്റ്റലില്‍വെച്ച്‌ വനിതാ നേതാവിനെ അപമാനിക്കാന്‍ ശ്രമിച്ച സംഭവത്തില്‍ നടപടിയെടുത്ത് ഡിവൈഎഫ്‌ഐ
തൃശ്ശൂര്‍: തലസ്ഥാനത്ത് ഡിവൈഎഫ്‌ഐ വനിതാ നേതാവിനെ എംഎല്എ ഹോസ്റ്റലില്‍ വച്ച്‌ അപമാനിക്കാന്‍ ശ്രമിച്ച സംഭവത്തില്‍ നടപടി എടുത്ത് പാര്‍ട്ടി നേതൃത്വം. സംഭവത്തില്‍ ഇരിങ്ങാലക്കുട ബ്ലോക്ക് ജോയിന്റ് സെക്രട്ടറിയായ ആര്‍.എ ജീവന്‍ലാലിനെ സസ്‌പെന്‍ഡ് ചെയ്തു. ഒരു വര്‍ഷത്തേക്കാണ് ജീവനെ പാര്‍ട്ടിയുടെ പ്രാഥമിക അംഗത്വത്തില്‍ നിന്നും സസ്‌പെന്‍ഡ് ചെയ്തിരിക്കുന്നത്. മാത്രമല്ല ഇരിങ്ങാലക്കുട ബ്ലോക്ക് ജോയിന്റ് സെക്രട്ടറി സ്ഥാനത്ത് നിന്നും ജീവന്‍ ലാലിനെ നീക്കം ചെയ്യുകയും ചെയ്തു.
കാട്ടൂര്‍ സ്വദേശിനിയായ വനിതാ നേതാവ് ഇരിങ്ങാലക്കുട ഡിവൈ.എസ്‌പി. ഫേമസ് വര്‍ഗീസിന് ചൊവ്വാഴ്ച രാത്രി പരാതി നല്‍കിയതോടെയാണ് നടപടിയെടുക്കാന്‍ പാര്‍ട്ടി നിര്‍ബന്ധിതമായത്.കാട്ടൂര്‍ സ്റ്റേഷന്‍ അതിര്‍ത്തിയില്‍ വരുന്ന കേസായതിനാല്‍ ഡിവൈ.എസ്‌പി. ഇത് കാട്ടൂര്‍ എസ്‌ഐ.ക്ക് കൈമാറി. കാട്ടൂര്‍ പൊലീസാണ് പരാതിക്കാരിയുടെ മൊഴിയെടുത്തത്.
സിപിഎം നേതാക്കള്‍ക്ക് പരാതി നല്‍കിയിട്ടും നടപടിയൊന്നുമില്ലെന്നും പരാതി ഒതുക്കി തീര്‍ക്കാനാണ് അവര്‍ ശ്രമിച്ചതെന്നുമാണ് യുവതിയുടെ പരാതിയില്‍ പറയുന്നത്. സംഭവം നടന്നത് തിരുവനന്തപുരത്തായതിനാല്‍ കേസ് തിരുവനന്തപുരത്തേക്ക് മാറ്റുമെന്ന് പൊലീസ് അറിയിച്ചു. ജൂലൈ 11 നാണ് കേസിനാസ്പദമായ സംഭവം. എംഎല്എ ഹോസ്റ്റലിലെ ഇരിങ്ങാലക്കുട എം.എല്‍എയുടെ മുറിയില്‍ വെച്ച്‌ ജീവന്‍ലാല്‍ പീഡിപ്പിക്കാന്‍ ശ്രമിച്ചുവെന്നാണ് പരാതി.
