അശ്വതിക്കും, കൂട്ടുകാർക്കും സ്കൂളിലേക്ക് വരാനുള്ള വഴി സഞ്ചാര യോഗ്യമാക്കണം: നിവേദനവുമായി സഹപാഠികൾ

സ്കൂളിന് തൊട്ടടുത്തുള്ള ഇടവഴിയിലൂടെ മഴക്കാലത്ത് മലിനജലം കെട്ടിക്കിടക്കുന്നത് കാരണം നടക്കാൻ കഴിയാത്ത സാഹചര്യമാണ് ഉള്ളത്. രണ്ടാം ക്ലാസുകാരിയായ അശ്വതിക്ക് ഈ ഇടവഴിയിലൂടെ മാത്രമെ സ്കൂളിലെത്താൻ സാധിക്കുകയുള്ളൂ. കഴിഞ്ഞയാഴ്ച അശ്വതിയുടെ സഹോദരിയായ നീലിമക്ക് എലിപ്പനി റിപ്പോർട്ട് ചെയ്തത് കാരണം ഈ മലിനജലത്തിലൂടെ നടക്കുന്നത് അപകടമാണെന്ന് മനസ്സിലാക്കി ദിവസങ്ങളോളം അശ്വതി സ്കൂളിലെത്തിയിരുന്നില്ല. കാലിന് ചൊറിച്ചിൽ ഉൾപ്പെടെ അസുഖങ്ങളും ഉണ്ടാവുന്നുണ്ട്.

സ്കൂളിലെ മറ്റു കുട്ടികളും ഈ ഇടവഴിയാണ് സ്കൂളിലേക്ക് വരാറുള്ളത്. അവരൊക്കെ മഴക്കാലത്ത് വഴി മാറി സഞ്ചരിക്കുമ്പോൾ അശ്വതിക്ക്  സ്കൂളിലേക്കെത്താൻ വേറെ വഴിയില്ലാതെ ബുദ്ധിമുട്ടുകയാണ്. മഴക്കാലമായാൽ ദുരിതപൂർണ്ണമായ യാത്ര നടത്തേണ്ടി വരുന്ന ഈ വഴി  സഞ്ചാരയോഗ്യമാക്കി തീർക്കാൻ  മുമ്പ് പല തവണ കുട്ടികൾ തന്നെ അധികൃതരുടെ ശ്രദ്ധയിൽ പെടുത്തിയിരുന്നെങ്കിലും പരിഹാരമുണ്ടായില്ല.

പ്രശ്നത്തിന് അടിയന്തിര പരിഹാരം കാണുമെന്ന് വാർഡ് മെമ്പർ കുട്ടികൾക്ക് ഉറപ്പ് നൽകിയിട്ടുണ്ട്. സ്കൂൾ ഡെപ്യൂട്ടി ലീഡർ ധനഞ്ജയ് എസ് വാസ്, അശ്വതി എന്നിവർ പങ്കെടുത്തു.