യൂറോ 2025 വനിതാ ചാമ്പ്യൻഷിപ്പ്: പെനാൽറ്റി ഷൂട്ടൗട്ടിൽ സ്വീഡനെ മറകടന്ന് ഇംഗ്ലണ്ട് സെമിഫൈനലിൽ
യൂറോ 2025 വനിതാ ചാമ്പ്യൻഷിപ്പിൽ സ്വീഡനെ തകർത്ത് സെമിഫൈനലിൽ പ്രവേശിച്ച് ഇംഗ്ലണ്ട്. നിലവിലെ ചാമ്പ്യൻമാരായ ഇംഗ്ലണ്ട് മത്സരത്തിൽ രണ്ട് ഗോളിന് പിന്നിൽ നിന്ന ശേഷമാണ് സമനില പിടിച്ചത്. നിശ്ചിത സമയത്തും അധിക സമയത്തും 2-2 എന്ന നിലയിലായതോടെയാണ് മത്സരം ഷൂട്ടൗട്ടിലേക്ക് നീങ്ങിയത്.
ആദ്യ പകുതിയിൽ തന്നെ സ്വീഡൻ കൊസോവെയർ അസ്‌ലാനിയുടെയും സ്റ്റിന ബ്ലാക്ക്‌സ്റ്റീനിയസിന്റെയും ഗോളുകളുടെ പിൻബലത്തിൽ 2-0ത്തിന് മുമ്പിലെത്തി. അസ്‌ലാനിയുടെ 50-ാമത്തെ അന്താരാഷ്ട്ര ഗോളായിരുന്നു. എന്നാൽ തോൽവി മുന്നിൽ കണ്ട ഇംഗ്ലണ്ടിന് 79-ാം മിനിറ്റിൽ ലൂസി ബ്രോൺസ് ജീവശ്വാസം നൽകി.
മിഷേൽ അഗ്‌യെമാങ് ഇഗ്ലംണ്ടിനായി മിനിറ്റുകൾക്കുള്ളിൽ ഒരു ഗോൾ കൂടി നേടിയതോടെ മത്സരം സമനിലയിലെത്തി. അധിക സമയത്ത് ഇരു ടീമുകൾക്കും വല കുലുക്കാൻ സാധിക്കാഞ്ഞതോടെ മത്സരം സമനിലയിൽ കലാശിക്കുകയായിരുന്നു. സെമിഫൈനലിൽ ഇറ്റലിയാണ് ഇംഗ്ലണ്ടിന്റെ എതിരാളി. 1997 ന് ശേഷം ആദ്യമായാണ് യൂറോ സെമിഫൈനൽ കളിക്കാൻ ഇറ്റലി എത്തുന്നത്.
