സംയുക്ത സമരസമിതിയുടെ നേതൃത്വത്തിൽ ബെവ്കോ ജീവനക്കാർ പണിമുടക്കിലേക്ക്
കോഴിക്കോട്: വിവിധ ആവശ്യങ്ങൾ ഉന്നയിച്ച് സംയുക്ത സമരസമിതിയുടെ നേതൃത്വത്തിൽ ബെവ്കോ ജീവനക്കാർ പണിമുടക്കിലേക്ക്. ബെവ്കോ ചില്ലറ വില്പനശാലകളിൽ ജോലി ചെയ്തുവരുന്ന ജീവനക്കാർക്ക് മാനേജ്മെന്റ് ശുപാർശ പ്രകാരമുള്ള അഡീഷണൽ അലവൻസ് വർദ്ധിപ്പിച്ച് നൽകാത്തതിലും നിലവിൽ ലഭിച്ചുകൊണ്ടിരുന്ന അഡീഷണൽ അലവൻസ് വെട്ടിക്കുറച്ച സർക്കാർ നിലപാടിലും പ്രതിഷേധിച്ചുകൊണ്ട് ഒക്ടോബർ 28, 29 തീയതികളിൽ പണിമുടക്ക് നടത്തുന്നത്. സിഐടിയു നേതൃത്വം നൽകുന്ന രണ്ട് സംഘടനകളാണ് ഈ മാസം 28ന് സെക്രട്ടറിയേറ്റ് മാർച്ചും ധർണ്ണയും നടത്തുവാൻ തീരുമാനിച്ചിട്ടുള്ളത്.
.
.
ഐ.എൻ.ടി.യു.സി നേതൃത്വം നൽകുന്ന രണ്ട് സംഘടനകളും എഐടിയുസി സംഘടനകളുമാണ് 29ന് പണിമുടക്ക് പ്രഖ്യാപിച്ചിട്ടുള്ളത്. 14 ജില്ലയിലും വെയർ ഹൗസുകൾ കേന്ദ്രീകരിച്ച് മാർച്ച് ധർണ്ണയും നടത്തുന്നതിനും തീരുമാനിച്ചിട്ടുണ്ട്. 29ന് നടക്കുന്ന പണിമുടക്ക് വിജയിപ്പിക്കുവാൻ ബെവ്കോ എംപ്ലോയിസ് അസോസിയേഷൻ ഐഎൻടിയുസി കോഴിക്കോട് ജില്ലാ കമ്മിറ്റി യോഗം തീരുമാനിച്ചു.
സംസ്ഥാന ഓർഗനൈസിങ്ങ് സെക്രട്ടറി സബീഷ് കുന്നങ്ങോത്ത് ഉൽഘാടനം ചെയ്തു. ജില്ലാ പ്രസിഡന്റ് സി.കെ ഗിരീഷ് കുമാർ അദ്ധ്യക്ഷതവഹിച്ചു. ജില്ലാ സെക്രട്ടറി കെ പ്രദീപ്. സംസ്ഥാന കമ്മിറ്റി മെമ്പർ പ്രഭീഷ് പി ടി, റെജിമോൻ ടി ടി, എം ശിവശങ്കരൻ, സുജേഷ് എംഎസ്, ടി നിഖിൽ എന്നിവർ സംസാരിച്ചു.
